PD nuk regjistrohet në zgjedhje, Celibashi rrëzon grupin Alibeaj

Partia Demokratike nuk regjistrohet në zgjedhjet lokale të 14 Majit, vendosi sot kryekomisioneri Ilirjan Celibashi.

Në mbledhjen e sotme, Celibashi refuzoi kërkesën e grupit Alibeaj, që në seancë u përfaqësua nga Indrit Sefa, për tu regjistruar në lolaket e ardhshme si Partia Demokratike.

Kryekomisioneri argumentoi se “deklarata solemne” në dokumentat e depozituar në KQZ është firmosur nga personi i deleguar që është Enkelejd Alibeaj dhe jo Lulzim Basha, që sipas Celibashit, rezulton kryetar i PD referuar një vërtetimi gjykate. Dhe kjo, sipas Celibashit është jo ligjore, pasi siç deklaroi, ky akt është “ekskluzivisht i kryetarit të partisë”.

Argumenti

“Në kushtet kur në zyrën e regjistrit të partive politike të Gjykatës së rrethit Tiranë, nuk është bërë njoftimi i dorëheqjes së zotit Lulzim Basha si kryetar si dhe nuk është bërë dorëzimi i aktit sipas të cilit, bazuar në statutin e PD, është zoti Alibeaj ai që ushtron detyrën e kryetarit, atëherë, ai si nënkryetar i PD, mundet të pranojë se i ushtron disa kompetenca të kryetarit, apo edhe pjesën më të madhe të këtyre kompetencave, por nuk mund të pranohet kurrsesi që ai ushtron të gjitha komptetencat dhe përgjegjësitë e PD.

Ndaj, në kushtet kur deklarata nuk është sipas përcaktimeve të nenit 64, pika 2, gërma e, në vlerësimin tim, do duhej të nënshkruhej nga kryetari i partisë, ose nga ai person që ligjërisht i ushtron atributet e kryetarit të partisë, unë mendoj dhe vlerësoj se kërkesa e Partisë Demokratike për t’u regjistruar si subjekt zgjedhor nuk ka bazë ligjore dhe nuk duhet të pranohet”, theksoi Ilirjan Celibashi.

Përfaqësuesi i grupit Aliebaj, Idrit Sefa e quajti jo ligjor vendimin e kreut të KQZ-së. Ai paralajmëroi ankim në Komisionin e Ankesave dhe Sanksioneve.

Berisha me kandidatë në zgjedhje, Alibeaj jo

Më herët, Celibashi rrëzoi dhe kërkesën e grupit tjetër të drejtuar nga Sali Berisha me argumentin se kryetar i PD-së rezulton ende Lulzim Basha.

Me vendimin e sotëm, grupi Alibeaj nuk do të ketë kandidatë në zgjedhjet e ardhshme lokale, ndërsa PD e drejtuar nga Sali Berisha, sic ka thënë ish-kryeministri, do të futet në zgjedhje me kandidatët e dalë nga “Primaret” përmes një koalicioni mes PL-së së Ilir Metës dhe disa partive të vogla.