PD: Si qeveria Rama po fsheh shpenzimet për bileta avioni, 9.5 mln euro në 2023

Partia Demokratike denoncoi këtë të premte se qeveria po fsheh shpenzimet për fluturime.

Zëdhënësja e Antikorrupsionit në PD Genta Vangjeli, tha se në analizën vjetore të APP-së për 2023 janë pasqyruar shpenzimet për blerjen e biletave të transportit ajror ndërkombëtar. Sipas këtij institucioni, shtoi, për vitin 2022 vlera totale e shpenzuar për bileta ishte 2.9 milion euro ndërsa për vitin 2023 vlera totale ishte 3.6 milion euro ose 25% më shumë.

Po sipas saj, të dy këto shifra fshehin fluturimet dhe shpenzimet lidhur me to të zyrtarëve të Ramës.

“Partia Demokratike bën me dije publikun se shpenzimet fundore për dieta e blerjen e biletave të transportit ajror për vitin 2022 kapin vlerën totale të 8.1 milion euro Për vitin 2023 kjo vlerë shkon në 9.5 milion euro ose 18% më shumë”, tha ajo.

Ajo u bëri apel institucioneve ligjzbatuese të hetojnë.

“Vlerat e paraqitura në raportin e APP janë pothuaj 3 fish më të ulëta se vlerat reale të regjistruara periodikisht në publikimet e shpenzimeve për blerje të biletave dhe udhëtimet jashtë vendit. Sikurse vërehet shpenzimet reale nuk përkojnë me vlerat totale sipas raportit të APP-së. A janë këto rezultate veprime të kryera për shkaqe të mungesës së disiplinës profesionale apo veprime të kryera me dashje për të fshehur shpenzimet abuzuese e pa kriter të qeverisë që na drejton. Kjo duhet hetuar …. Për parimin e transparencës as nuk po flasim sepse kjo qeveri dhe administrata e saj e konsiderojnë një fjalë boshe që kërkohet nga Brukseli, por nuk ka vlerë në Shqipëri”, shtoi ajo.