Partia Demokratike dega Shkodër i ka bërë thirrje sot qytetarëve të dalin masivisht në procesin e votimit, duke e cilësuar ditën e sotme si një mundësi kyçe për ndryshimin. Në një deklaratë për shtyp, PD Shkodër thekson se pjesëmarrja e lartë është thelbësore për të sjellë “ndryshimin e shumëpritur” për Shkodrën dhe Shqipërinë.
Sipas deklaratës, vota e lirë e qytetarëve sot është mundësia për të refuzuar “qeverinë Rilindase dhe qeverisjen e Becit që sollën vetëm shkatërrim dhe varfëri për Shkodrën”. PD Shkodër thekson se çdo votë ka rëndësi të jashtëzakonshme për të ndryshuar atë që ata e quajnë “sistemin neokomunist që ka persekutuar Shkodrën në këto 12 vjet”.
Deklarata rendit gjithashtu një sërë shqetësimesh dhe arsyesh pse qytetarët duhet të votojnë për ndryshimin, duke përmendur “mungesën e investimeve, rritjen e çmimeve, rritjen e të gjitha taksave dhe tarifave vendore, rritjen e çmimit të ujit, kthimin me pagesë të autostradave të veriut ndryshe nga jugu që i ka pa pagesë, një diskriminim i pastër ndaj veriorëve”. Gjithashtu theksohet dhe “shpopullimi masiv i shkodranëve, të rinjve e të rejave, familjeve të tëra që kanë lënë Shkodrën në mungesë të shpresës dhe thellimit të varfërisë”.
Partia Demokratike në Shkodër shpreh bindjen se “Fitorja jonë është e padisjutueshme pasi pjesëmarrja dhe shifrat po flasin qartë për një fitore të sigurt të Partisë Demokratie dhe Aleancës për Shqipërinë Madhështore!”.
Në mbyllje të deklaratës, PD Shkodër u bën thirrje qytetarëve që sot, të gjithë bashkë, t’i kthejnë “dinjitetin Shkodrës sonë dhe të dënojmë me votë narko shtetin e Edi Ramës dhe Benet Becit!”. Ata theksojnë se “Sot ata kanë rënë sepse sot vendos qytetaria shkodrane dhe jo krimi e droga!”, duke e përmbyllur me thirrjen “Së bashku për ndryshimin e madh”.
Discussion about this post