Ish-kreu i FRPD, Belind Këlliçi, njëkohësisht një nga mbështetësit e ish-kryeministrit Sali Berisha, ka reaguar pas njoftimit nga grupi i punës së FRPD për hapjen e fushatës për anëtarësimet e reja.
Nëpërmjet një statusi në ‘”Facebook”, Këlliçi sqaron se sipas tij, kryesia e FRPD ka marrë një vendim në datën 12 nëntor të këtij viti dhe se çdo manovër tjetër për të kapur këtë institucion është e kotë.
Gjithashtu ai thekson se asnjë institucion nuk mund të mbivendoset mbi këtë vendim, ndërsa shton se ka vetëm një FRPD dhe se ajo është në anën e duhur të historisë.
“Ka vetëm një FRPD dhe ajo është në anën e duhur të historisë. Gjithë të tjerat janë iluzione për të përçarë dhe shpërqendruar të rinjtë demokratë. Ne jemi krenarë për arritjet e Forumit tonë dhe nuk mund të lejojmë asnjë njeri të cënojë autonominë dhe historinë tonë”, shkruan Këlliçi.
Më herët, Grupi i Punës për Zgjedhjet në FRPD, kanë njoftuar rifreskimin e strukturave të FRPD në të gjitha nivelet e partisë, duke sjellë anëtarë të rinj dhe duke pritur kandidatura për kryesimin e strukturave drejtuese në nivele të ndryshme.
Discussion about this post