Partia Demokratike e Kosovës ka hedhur hapin e parë ligjor pas vendimit ndaj katër ish-krerëve të UÇK-së. PDK ka dorëzuar në Kuvend projektligjin për ndryshimin dhe plotësimin e ligjit për Dhomat e Specializuara dhe Zyrën e Prokurorit të Specializuar, duke kërkuar përcaktim më të qartë të mandatit dhe kompetencave të tyre.
Nisma u bë publike nga kryetari i PDK-së, Bedri Hamza, i cili doli në një konferencë për mediat i shoqëruar nga deputetë të partisë.
Lëvizja vjen pesë ditë pas aktgjykimit të shkallës së parë ndaj Hashim Thaçit, Kadri Veselit, Rexhep Selimit dhe Jakup Krasniqit dhe pas protestave të zhvilluara në Prishtinë kundër vendimit.
Hamza deklaroi se reagimi i qytetarëve nuk mund të shpërfillet dhe se Kuvendi i Kosovës duhet të trajtojë institucionalisht çështjen.
Sipas kreut të PDK-së, projektligji nuk synon mbylljen e Gjykatës Speciale apo pengimin e hetimeve për çështjet që hyjnë në juridiksionin e saj. Synimi i deklaruar është përcaktimi më i qartë i kufijve të mandatit dhe kompetencave të Dhomave të Specializuara.
“Projektligji përcakton se, kur një rast nuk hyn në këtë juridiksion, ai transferohet në Kosovë, së bashku me dosjen, provat dhe materialin e tij. Pra, drejtësia vazhdon, por vazhdon aty ku duhet të vazhdojë”, tha Hamza.
PDK kishte paralajmëruar prej disa ditësh ndërmarrjen e hapave ligjorë në Kuvend pas aktgjykimit të Hagës. Hamza kishte deklaruar më herët se partia po shqyrtonte të gjitha veprimet demokratike dhe ligjore në dispozicion.
Nisma vjen pas aktgjykimit të 16 shtatorit, kur Dhomat e Specializuara shpallën fajtorë për krime lufte Thaçin, Veselin, Selimin dhe Krasniqin. Thaçi dhe Krasniqi u dënuan me nga 25 vjet burg, Veseli me 18 dhe Selimi me 13 vjet. Ata u shpallën të pafajshëm për akuzat për krime kundër njerëzimit.
Aktgjykimi është i shkallës së parë dhe çështja mund të kalojë në procesin e apelit.
Discussion about this post