Kryeministri Albin Kurti e ka pritur sot në takim emisarin e Mbretërisë së Bashkuar për Ballkanin Perëndimor, Sir Stuart Peach. Siç njofton zyra e kryeministrit, Kurti dhe Peach diskutuan për paqen, stabilitetin dhe sigurinë rajonale.
ZKM thotë se Kurti e falënderoi emisarin për ndihmën dhe mbështetjen e Mbretërisë së Bashkuar para, gjatë dhe pas luftës në Kosovë dhe shpalljes së pavarësisë.
“Mbretëria e Bashkuar është partner i Kosovës i domosdoshëm për zhvillim dhe siguri, tha kryeministri duke mirëpritur emërimin e emisarit Peach si veprim i duhur që do t’u kontribuojë proceseve politike në Ballkanin Perëndimor”, thuhet në komunikatën e Zyrës së Kryeministrit.
Në anën tjetër, sipas ZKM-së, Peach vlerësoi marrëdhëniet mes Kosovës dhe Mbretërisë së Bashkuar dhe shprehu gatishmërinë dhe vullnetin për ta thelluar bashkëpunimin, veçanërisht në fushën e sundimit të ligjit dhe të sigurisë si dhe dialogun me Serbinë.
Discussion about this post