Pak ditë më parë në zonën e Prespës u gjetën 3 pelikanë të ngordhur dhe disa mjellma. Rezultati i analizave konfirmoi se bëhej fjalë për gripin e shpendëve, ndërsa autoritetet nuk kanë marra masat e duhura në këto ditë. Ajo që mbetet ende e paqartë është nëse kemi të bëjmë me pelikanë që kanë ngordhur në anën greke të liqenit dhe dallgët i kanë sjellë në ujërat shqiptare apo nëse ata kanë ngordhur në pjesën tonë të liqenit, por gjithsesi pas konfirmimit të rastit, situata po monitorohet nga institucionet. Fatmir Ozuni, drejtori rajonal i shërbimit veterinar Korçë është kujtuar vetëm pas kaq ditësh të reagojë. Ai tha se në qarkun e Korçës deri më tani nuk është shfaqur asnjë rast i influencës aviare.
“Ka një rast të diagnostikuar të pelikanit kaçurrel në liqenin e Prespës së Vogël. Sipas analizave të kryera, ky shpend ka rezultuar i prekur nga gripi i shpendëve. E gjithë zona përreth është shpallur zonë risku, duke krijuar kështu kushtet e karantinimit. Në përditshmëri jemi në komunikim me fermerët e kësaj zone, si dhe janë kryer analiza të shpendëve në këtë zonë dhe jemi në pritje të përgjigjeve.
Masat konkrete që ne kemi marrë si drejtori janë: shpallja zonë risku, kemi ndaluar futjen dhe daljen e shpendëve nga oborri. Në bazë të njohurive të mia, ka mundësi që shkalla e infeksionit të rritet në rast se nuk merren masa. Ne po përpiqemi në maksimum që kjo të mos ndodhë”, tha ai. Ndërkohë, ministria konfirmoi rastin e gripit të shpendëve në Durrës dhe tha se po merren masat e nevojshme, por ditën e djeshme raste të tilla janë shfaqur edhe në disa fshatra në Lushnjë.
Discussion about this post