Protagonist absolut me Kombëtaren, ku ishte edhe heroi i fitores së regjistruar së fundmi në Gjeorgji, por ende pa hapësira të mjaftueshme te Interi. Kristjan Asllani mbetet një prej xhevahireve të zikaltërve dhe një lojtar i kërkuar në merkato.
Klubet e Premier League vijojnë të shfaqin interes për 22-vjeçarin kuqezi, që garanton kualitet dhe vizion loje në mesfushë. Edhe pse Asllani e rinovoi së fundmi marrëveshjen me gjigandët e Serie A, ku është nën kontratë deri në vitin 2028, Interi do ta shiste në rast të një oferte të kënaqshme financiare.
Madje, zikaltërit kanë përcaktuar edhe çmimin e futbollistit shqiptar. Për 25 milionë euro, çdo klub i interesuar mund ta bëjë mesfushorin të vetin. Kampionët e Italisë do të pranonin marrëveshjen me një skuadër që do t’i ofronte mundësi lojtarit të kishte më tepër hapësira.
Premier League do të ishte gjithashtu një kampionat joshës për Asllanin, sepse për momentin ajo cilësohet si liga më e fort në botë. Vetëm pak kohë më parë, për mesfushorin shfaqi interes Aston Villa, por gjithçka mbeti vetëm në kuadrin e bisedimeve paraprake.
Sezonin e kaluar, Kristjan Asllani luajti 23 ndeshjen me Interin, ku realizoi një gol teksa dha edhe dy asiste. Për kuqeziun, ky është sezoni i tretë në Milano me zikaltërit.
Discussion about this post