Në një intervistë për mediat, ish-kryeministri Sali Berisha, ka komentuar afrimin e Presidentit Meta me amerikanët dhe aludimet e qarkulluara në media se kreu i shtetit është i zgjedhuri i SHBA-ve për të përfaqësuar opozitën në Shqipëri. Berisha u shpreh se nuk ka asnjë lloj shqetësimi në lidhje me këtë çështje, pasi Partia Demokratike është një parti sovrane që nuk mund t’ia përcaktojë askush kryetarin. Ai shtoi më tej se i vetmi shqetësim që ka pasur ishte zgjedhja e kreut të PD-së, të cilën e ka realizuar tashmë.
“Absolutisht asnjë shqetësimi, PD është një parti sovrane dhe e ka faktuar në mënyrën më të fuqishme sovranitetin e saj. Askush nuk mund t’i caktojë kësaj force politike kryetarin. Duhet të kesh një arsyetim logjik deficitar që të mendosh se ka një parti tjetër opozitare për veç PD-së në Shqipëri. I vetmi shqetësim që kam pasur ka qenë që Partia Demokratike të zgjedhë kryetarin dhe e kam arritur. Partia Demokratike ka qenë dhe do mbetet një forcë pro-amerikane, kurrë veçse sovrane. Në asnjë rrethanë mund të jetë kush që të caktojë kryetarin e saj. Ky nuk është standardi i SHBA-ve, por standardi i një grupi të caktuar” – tha Berisha.
Discussion about this post