I përballur me një stuhi kritikash, Presidenti Joe Biden planifikon të flasë të premten për evakuimin kaotik të amerikanëve dhe aleatëve nga Afganistani, ndërsa Shtetet e Bashkuara përballen me pengesa që variojnë nga pikat e kontrollit të talebanëve të armatosur deri te problemet e dokumentave të udhëtimit.
Ndërsa Presidenti Biden më parë ka fajësuar afganët për dështimin e Shteteve të Bashkuara për të evakuuar më shumë aleatë përpara marrjes së papritur të pushtetit nga talebanët këtë muaj, zyrtarët amerikanë i thanë agjencisë Associated Press se diplomatët amerikanë kishin kërkuar zyrtarisht javë më parë që administrata Biden të shtonte përpjekjet e evakuimit.
Dhjetëra mijëra njerëz mbeten për t’u evakuuar përpara afatit të 31 gushtit të Shteteve të Bashkuara për të tërhequr trupat e saj nga vendi, megjithëse ritmi u shtua shpejt. Një zyrtar i mbrojtjes tha se rreth 5,700 njerëz, përfshirë rreth 250 amerikanë, u evakuuan nga Kabuli me 16 avionë transporti C-17. Gjatë dy ditëve të mëparshme, rreth 2,000 njerëz në ditë u transportuan me avion.
Presidenti Biden do të takohet me ekipin e tij të sigurisë kombëtare për evakuimet dhe do të flasë nga Shtëpia e Bardhë të premten pasdite. Përveç kritikave nga disa ligjvënës që thonë se Shtetet e Bashkuara nuk arritën të planifikonin siç duhet marrjen e shpejtë të pushtetit nga talebanët, edhe diplomatët amerikanë kanë shprehur shqetësimin e tyre.
Në korrik, më shumë se 20 diplomatë në Ambasadën Amerikane në Kabul shprehën shqetësimet e tyre se evakuimi i afganëve që kishin punuar për amerikanët nuk po bëhej në kohë.
Në një kabllogram të dërguar përmes Departamentit të Shtetit, diplomatët thanë se situata në terren ishte e tmerrshme, se talebanët ka të ngjarë të marrin kontrollin e kryeqytetit brenda muajve të tërheqjes së 31 gushtit dhe i bënte thirrje administratës Biden të fillojë menjëherë një përpjekje të përbashkët për evakuim. Kjo është sipas zyrtarëve të njohur me dokumentin të cilët folën në kushte anonimiteti.
Presidenti Biden ka thënë se kaosi që u shpalos si pjesë e tërheqjes ishte i pashmangshëm pasi lufta gati 20-vjeçare po përfundonte. Ai tha se po ndiqte këshillat e presidentit të Afganistanit të mbështetur nga SHBA, Ashraf Ghani, për të mos evakuuar më herët përkthyesit dhe afganët e tjerë në rrezik. Ghani u largua nga vendi fundjavën e kaluar ndërsa talebanët pushtuan kryeqytetin.
Biden tha gjithashtu se shumë aleatë afganë në rrezik nuk kishin dashur të largoheshin nga vendi. Por grupet e refugjatëve nxjerrin në pah kërkesat e mijëra afganëve kohë më pare për viza që do t’i lejonin ata të strehoheshin në Shtetet e Bashkuara. / VOA
