Dinamo do të presë Teutën në ‘Elbasan Arena’ këtë të martë në orën 16:45 për javën e 12 të Superligës.
Duke folur në prag të kësaj sfide trajneri i ‘Bluve’ të kryeqytetit, Bledi Shkëmbi ka folur së pari për disfatën e thellë ndaj Laçit me rezultatin 5-0, të cilën e cilësoi si të turpshme.
“Ishte një rezultat i thellë, një ndeshje e turpshme. Nuk ishte problem i mbrojtjes, por i gjithë skuadrës. Kemi pak kohë të përgatitemi, pasi luajmë nesër me Teutën. Kemi folur me skuadrën. Jemi munduar të marrim përgjegjësitë, por edhe të kuptojmë çfarë na ndodhi me Laçin. Nesër do të jetë një ndeshje me fytyrë tjetër”.-tha ai.
Më tej tekniku shtoi se ai rezultati nuk tregoi se Dinamo nuk ka burra, pasi është gjë që i ndodh çdo ekipi.
“Humbje me Laçin nuk tregon se nuk kemi burra në skuadër, i ndodh shumë skuadrave në botë. Humbja me Tiranën dhe kjo duket sikur ka mungesë karakteri. Treguam që duhet të kishim më shumë karakter në situata të veçanta, të mos linim që ndeshja të rrëshqiste në atë drejtim. Skuadra ka burra dhe lojtarë të fortë. Të fortë janë ata që rikthehen pas momenteve të vështira. Nuk kemi bërë asnjëherë dy ndeshje të dobëta radhazi. Ta fshijmë ndeshjen me Laçin dhe të fitojmë me Teutën”.-tha Shkëmbi.
Drejtuesi i stolit të ‘Nëndetëses blu’ ka thënë ndër të tjera se qëllimi i tij është që ta përfundojnë këtë kampionat në 4 vendet e para.
“Ne vazhdojmë të synojmë, të kemi objektiv 4 vendet e para. Vendi i tretë nuk është larg. Edhe Tirana që është e para, si dhe Kukësi, ndodh që të ketë ulje e ngritje. E rëndësishme është ajo që bëjmë ne vetë”.-vijoi ai.
Shkëmbi nuk la pa përmendur as ish-shokun e skuadrës që ka marrë drejtimin e skuadrës se durrsakëve, Renato Arapin, të cilit i uroi suksese.
“Nuk e prisja kaq shpejt të përballesha me Arapin. I urova suksese që kur u bë trajner. Më vjen mirë që shumë shokë të mi janë bërë trajnerë apo drejtojë.”,-shtoi ai./K.T/Gijotina.com
Discussion about this post