Përcillet në banesën e fundit, kolegët mesazh prekës për policin e vetëvrarë

Është përcjellë mes lotësh nga familjarët dhe miqtë e tij për në banesën e fundit polici që i dha fund jetës duke u vetëvrarë në zyrën e tij.

Arben Pjeçi do varroset në Durrës, aty ku dhe jetonte me familjen e tij.

Oficeri 57-vjeçar ishte babai i dy fëmijëve dhe ishte dënuar me vendim të formës së prerë nga Gjykata e Shkallës së Parë e Juridiksionit të Përgjithshëm Durrës, me punë në komunitet për plagosje të lehtë pas një sherri me komshiun dy vjet më parë.

Nënkomisari Arben Pjeçi me një karrierë 35-vjeçare në polici i ka dhënë fund jetës ditën e djeshme në zyrën e tij në policinë e Durrësit.

Sipas policisë, në ambientet e Komisariatit të Policisë Durrës është hapur me forcë zyra e oficerit Policisë Gjyqësore, Arben Pjeçi, i cili është gjetur i vetëvrarë me armën e shërbimit.

Kolegët e tij përmes një postimi në Instagram i kanë dhënë lamtumirën e fundit. Ata shprehen se u largua duke lënë pas hijen e rëndë të fajit.

“Për Ty, Arben! Jeta askujt nuk i është dhënë në pronësi, por vetëm në përdorim. E ti nuk kishe asnjë të drejtë të merrje këtë vendim për jetën! Megjithatë, ti ike e pas le hijen e rëndë të fajit. Lamtumirë koleg! U prehsh në paqen që nuk e gjete dot mes nesh. I lehtë të qoftë dheu mbi trup e shpirti të ndritë në parajsë”, shkruajnë kolegët e tij.