Kryetari i Partisë së Lirisë, Ilir Meta ka dhënë një deklaratë të shkurtër për mediat pas takimit me kreun e PD, Sali Berisha në selinë blu. Meta tha se në fokus të diskutimeve ishin zgjedhjet lokale të 14 majit, teksa tha se PL do të fusë kandidatët e saj në zgjedhjet për primaret që do të bëjë PD.
Për mediat, Meta deklaroi se i ka propozuar emrin e një “super politikani” Berishës, për të qenë kryetari i ardhshëm i këshillit Bashkiak të Tiranës.
“Jemi në një sintoni të plotë, kryetari i ardhshëm i bashkisë, i opozitës së vërtetë që do të triumfojë dhe kryetari i ardhshëm i këshillit të bashkisë, parlamentit të Tiranës do të bëjë një spektakël në pak muaj. PL respekton primaret, është një risi e jashtëzakonshme, kemi kërkuar që të realizohet sa më shpejt. Kudo që kemi kandidatë të sigurt për fitore, do t’i përfshijmë në primaret e përbashkëta. Kandidatët të respektojnë njëri tjetrin, kush e dëmton tjetrin, përjashtohet nga gara. Nuk kemi pasur asnjë diskutim për emrin që do të jetë në Tiranë apo kudo tjetër sepse ky proces i takon primareve. I kam propozuar një emër Berishës që ai e priti me shumë kënaqësi. Parlamenti i ardhshëm i Tiranës do të jetë shumë i rëndësishëm”, tha Meta.
Discussion about this post