Ka përfunduar afati për paraqitjen e kandidaturave për pozicionin e Drejtuesit të Prokurorisë së Posaçme Kundër Korrupsionit dhe Krimit të Organizuar (SPAK). Këshilli i Lartë i Prokurorisë ka bërë të ditur sot emrat e prokurorëve që kanë shprehur interes për të drejtuar këtë institucion kyç në luftën kundër korrupsionit dhe krimit të organizuar.
Sipas njoftimit zyrtar, pas përfundimit të afatit të aplikimeve dhe shqyrtimit të dokumentacionit të dërguar edhe përmes shërbimit postar, janë regjistruar katër kandidatë:
-
Klodian Braho
-
Elvin Gokaj
-
Doloreza Musabelliu
-
Adnan Xholi
Të katër prokurorët kanë një karrierë të gjatë në sistemin e drejtësisë dhe përvojë në hetimin e çështjeve komplekse penale, përfshirë korrupsionin dhe krimin e organizuar. Procesi i përzgjedhjes së drejtuesit të ri të SPAK pritet të ndiqet me vëmendje të veçantë nga publiku, mediat dhe partnerët ndërkombëtarë, për shkak të rolit kyç që ka ky institucion në reformën në drejtësi dhe në luftën kundër pandëshkueshmërisë.
Këshilli i Lartë i Prokurorisë do të vijojë me fazat e mëtejshme të procesit, përfshirë verifikimin e kritereve ligjore, vlerësimin e figurës dhe performancës profesionale të kandidatëve, si dhe zhvillimin e intervistave publike përpara marrjes së vendimit përfundimtar.
Ky është procesi i dytë i përzgjedhjes së kreut të SPAK që nga krijimi i tij në vitin 2019. Mandati aktual i drejtuesit të deritanishëm, Altin Dumani, është drejt përfundimit.
Discussion about this post