Gjykata e Tiranës ka caktuar gjyqtarin Agron Zhukri për të shqyrtuar kërkesën e të ashtuquajturit Komision i Rithemelimit të PD-së, lidhur me ndryshimet statutore brenda kësaj force politike. Çështja pritet që të shqyrtohet në ditët në vijim.
Në Kuvendin e organizuar nga ish-kryeministri Sali Berisha më 11 dhjetor, u miratuan disa ndryshime statutore në PD, ku u shkarkuan kryedemokrati Lulzim Basha, nënkryetarë dhe sekretari i përgjithshëm. Gjithashtu në këtë Kuvend u ndryshuan logoja dhe vula e Partisë Demokratike, duke rikthyer logon dhe vulën e vjetër të PD me të cilat u themelua 31 vite më parë në Qytet Studenti.
Në Gjykatën e Tiranës janë depozituar dy kërkesa lidhur me ndryshimet e statutit të Partisë Demokratike. Ditën e martë, Partia Demokratike depozitoi kërkesën për pasqyrimin e ndryshimeve statutore të partisë dhe organeve të zgjedhura në Kuvendin Kombëtar të 17 korrikut 2021. Ndërsa një ditë më pas, u kërkuar nga Komisioni i Rithemelimit pasqyrimi i ndryshimeve në statut të PD-së që u bënë në Kuvendin Kombëtar të 11 dhjetorit.
Discussion about this post