Përfundon takimi në Bruksel/ Nuk ka marrëveshje Kosovë-Serbi për targat e automjeteve

Ka përfunduar pa marrëveshje për targat takimi mes kryenegociatorëve të Kosovës dhe Serbisë, Besnik Bislimi dhe Petar Petkoviq, në Bruksel.

Lajmin e ka bërë të ditur përfaqësuesi i BE-së për dialog, Mirosllav Lajçak.

“Sapo përfunduan takimet e sotme të kryenegociatorëve në Bruksel. Rezultatet janë të përziera. Fatkeqësisht, nuk u arrit asnjë marrëveshje për targat, por ne kemi bërë përparim në çështjet e tjera duke përfshirë energjinë. Puna do të vazhdojë”, ka shkruar Lajçak.

Palët nuk kanë arritur kompromis për një zgjidhje afatgjate për çështjen e targave të automjeteve, edhe pse ka skaduar mandati prej gjashtë muajsh për grupet punuese që të arrijnë një marrëveshje.

Ndërkohë, pritet që të vazhdojë të zbatohet regjimi me letra ngjitëse.

Just finished today’s meetings of Chief Negotiators in Brussels. Results are mixed. Regrettably, no agreement was reached on licence plates, however we made progress on other files including energy. The work will continue. pic.twitter.com/UT6GAyrzND

— Miroslav Lajčák (@MiroslavLajcak) May 13, 2022