Ministrja e Jashtme, Olta Xhaçka, pas vizitës në Rinas, ka kryer një inspektim edhe në godinat e Qytetit Studenti, ku pritet që të vendosen refugjatët afganë të cilët do të mbërrijnë ditën e sotme. Por, ajo që u vu re ishte boshatisja e Qytetit Studenti nga banorët e përhershëm të tij, pikërisht studentët, të cilët prej dy ditësh u larguan me urdhër nga dhomat e tyre, me qëllim që qeveria Rama t’u kthejë “nderin” afganëve. Studentët u hoqën me forcë, madje disa që ishin me pushime u kërcënuan se do u hidheshin valixhet në rrugë nëse nuk lironin dhomat, me qëllim që pritja qeveritare për afganët të dilte sa më e denjë në aspektin propagandistik. E pas largimit me forcë, ministrja Xhaçka ka mbërritur në Qytetin Studenti, duke treguar mikpritjen qeveritare, të transmetuar nëpërmjet ERTV. Por, ajo që askush nuk sqaroi është fakti se ku do të strehohen studentët pas ardhjes së afganëve, të cilët shpesh herë detyrohen të marrin shtëpi me qira me çmime të kripura për shkak të mungesës së kapaciteteve strehuese të Qytetit Studenti. E tashmë, këto kapacitete do të jenë edhe më të vogla, pasi ndryshe nga shtetet e tjera fiqnje që pranuan të strehojnë afganët, duke i akomoduar në hotele, shteti shqiptar zgjodhi rrugën e shkurtër në kurriz të studentëve.
