Në një moment kritik për vendin, me zjarre masive që kanë shkaktuar dy viktima dhe dëme të konsiderueshme, Kryeministri Edi Rama ka reaguar sërish. Në një deklaratë të fundit, ai paralajmëron ndëshkim maksimal për zjarrvënësit dhe falënderon forcat në terren, duke shmangur përgjegjësinë për vonesat dhe mungesën e kapaciteteve. Ky qëndrim i tij i përsëritur, ngre pyetje serioze rreth efikasitetit të qeverisjes në situata emergjence.
Me më shumë se një dekadë në pushtet, Rama ka pasur të gjitha mundësitë për të ndërtuar një infrastrukturë të fortë dhe një sistem reagimi të shpejtë për emergjencat civile. Megjithatë, situata aktuale dëshmon një dështim të përsëritur, ku vendi mbetet i pambrojtur përballë zjarreve, ndërsa qeveria bazohet te ndihma e vendeve fqinje dhe puna heroike e forcave në terren.
Kryeministri thekson se “dy ditë e netë ekstremisht të vështira” po përballen me zjarre të mëdha në zona si Skënderbegas dhe Sojnik të Gramshit, Koshtan të Memaliajt, Hormovë dhe Kodër e Lekël të Tepelenës, si dhe në Delvinë. Ai shprehet se zjarret janë vënë nën kontroll, por kritikat e qytetarëve flasin për të kundërtën. Dëshmitë nga Delvina, Gramshi dhe zona të tjera flasin për reagime të vona dhe pajisje të pamjaftueshme.
Thirrja e Ramës ndaj qytetarëve për t’u treguar të kujdesshëm dhe për të sinjalizuar vatrat e zjarrit, ndërkohë që qeveria nuk ka investuar në një sistem mbrojtjeje efikas, interpretohet si një përpjekje për të zhvendosur fajin. Në vend që të ofronte një plan konkret për të parandaluar dhe menaxhuar situatën, ai sërish e mbyll deklaratën me një kërcënim ndaj zjarrvënësve, duke e cilësuar veprimin e tyre si krim. Kjo qasje, e bazuar te fajësimi i të tjerëve, e shfaq Kryeministrin Rama si të paaftë për të mbajtur përgjegjësi për dështimet e qeverisjes së tij.
Discussion about this post