Në puntatën e djeshme të “Për’puthen Prime”, Fjori Likja, një nga konkurrentet e programit, u përjashtua për shkak të videos së publikuar në prapaskenë, ku ajo përdori gjuhë raciste ndaj Melekut.
Megjithatë, është parë shpesh herë që një emision i tillë ka mbyllur një sy jo pak herë ndaj sjelljeve jo të këndshme të konkurrentëve, ndërkohë që mesa duket, edhe kësaj here qëllimi i tyre fillestar lidhur me këtë çështje ka qenë tolerimi, deri në momentin që kanë reaguar faktorë të jashtëm.
Kanë qenë pikërisht grupe organizatash e shoqatash civile rome të cilat u mobilizuan dhe dërguan shkresë pranë Komisionerit për Mbrojtjen nga Diskriminimi në lidhje me gjuhën e përdorur. Kjo gjë është përkthyer në përjashtimin e Fjorit nga programi, vendim ky, i marrë pa vullnet fillestar të produksionit dhe të autores së programit.
Lidhur me këtë situatë ta pakëndshme të krijuar në një nga televizionet më të mëdha shqiptare lind natyrshëm pyetja se pse kjo nismë e përjashtimit të konkurrentes nuk u mor menjëherë nga produksioni, por u deshën lobime dhe aktivizma të shumta nga organizatat.
Kemi parë shumë herë mos zbatime rregullash dhe mungesë të lartë etike në këtë emision, si dhe gjuhë por edhe veprime të dhunshme, të cilat trajtohen me tolerancë e pa sensibilizime.
Edhe pse këto veprime ndoshta duket sikur do i shërbejnë spektaklit si një strategji marketingu e klikimesh, vlen të thuhet se në një periudhë afatgjatë, një pjesë e mirë e publikut kanë humbur besueshmërinë në program, gjë që është reflektuar në disnivel klikimesh në krahasim me reality show të tjera shqiptare.
Discussion about this post