Kryetari i Partisë Demokratike, Sali Berisha, bëri homazhe të premten në mëngjes pranë monumentit përkujtimor të Azem Hajdarit, 27 vjet nga vrasja e tij pranë selisë së PD në Tiranë.
“Në këtë përvjetor, të rënies së tij për të mbetur i pavdekshëm, Azem Hajdari, së bashku me sivëllaun e tij, Besim Çerja, janë më të gjallë se kurrë, në idealet e shqiptarëve që aspirojnë lirinë dhe dinjitetin njerëzor. Idealet e Azem Hajdarit, sot janë më kushtruese, më ftuese se kurrë që nga viti 1990 e gjer në këtë moment, mbasi Shqipëria është zhytur sot në formën më të shëmtuar të diktaturave, që është diktatura e drogës, krimit dhe vjedhjes së shqiptarëve”, tha Berisha në një prononcim për mediat.
“Sot pluralizmi për të cilin Azem Hajdari dhe studentët liberatorë ecën drejt sakrificave sublime, për rivendosjen në Shqipëri të pluralizmit, defakto është i shtypur, i dhunuar. Sot vota e lirë nuk ekziston, fjala e lirë është në satrin e xhelatëve të pushtetit, në satrin e Edi Ramës, siç ishte ajo në diktaturën tjetër kur i atij i tij xhelat firmoste varje të poetëve, ekzekutim të qytetarëve për fjalën e lirë, mendimin e lirë. Sot është një ditë betimi do të thosha për çdo demokrate e demokrat shqiptar, për çdo deputete dhe deputet të PD, për çdo drejtuese dhe drejtues të kësaj partie dhe mbështetësit e saj, që të ngrihemi për të shpëtuar Shqipërinë, për të çliruar Shqipërinë, për të shpëtuar pluralizmin, për të shpëtuar votën e lirë, për të rikthyer votën e lirë, për të shpëtuar fjalën e lirë. Dhe njëherë të gatshëm për çdo çmim, për çdo sakrificë, mbasi liria ka çmim, liria dhe dinjiteti kërkojnë sakrifica”.
Më 12 shtator 1998 në Tiranë u vra Azem Hajdari, një nga figurat kryesore të lëvizjes studentore të vitit 1990 dhe deputet i Partisë Demokratike. Ai u qëllua me armë pranë selisë së PD-së, së bashku me truprojën e tij Besim Çera, i cili mbeti i vrarë në vend. Ngjarja ndodhi në një kohë tensioni politik të madh mes mazhorancës socialiste dhe opozitës demokratike. Vrasja e Hajdarit shkaktoi protesta të dhunshme nga mbështetësit e PD-së, të cilët sulmuan institucione shtetërore dhe u përplasën me forcat e rendit. Për vrasjen është dënuar me burgim të përjetshëm Jaho Mulosmani, por motivet dhe prapaskenat politike të atentatit mbeten ende të debatueshme.
Discussion about this post