Kryeministri i Kosovës, Albin Kurti këto ditë është bërë lajm nëpër media pasi përkujtoi vrasjen e ish-politikanit dhe ish-kryeministrit serb, Zoran Gjingjiç. Për këtë të fundit, nesër do të mbahet një përkujtim në Parlamentin Evropian (PE) në Strasburg.
“European Western Balkans” raporton se më 16 mars në orën 11:00 do të organizohet një përkujtim nga grupi parlamentar Socialist dhe Demokratët në Parlamentin Evropian.
“Zoran Gjingjiç dhe trashëgimia e tij politike do të diskutohen nga anëtarët e grupit socialdemokrat në Parlamentin Evropian, si dhe Zoran Lutovac, kryetar i Partisë Demokratike dhe deputet në Parlament, Ksenija Markoviç, Sekretarja Ndërkombëtare e Partisë Demokratike dhe deputetët, si dhe Nemanja Todoroviç Shtiplija, kryeredaktor i portalit European Western Balkans.” – bëhet e ditur mes tjerash.
Ndërkohë, vlen të përmendet se pikërisht kryeministri Kurti po qëndron për një vizitë në Strasburg e cila sipas njoftimit, do të vazhdojë edhe nesër.
Nuk dihet nëse Kurti do të marrë pjesë në përkujtim, por në komunikatën e Zyrës së Kryeministrit mes tjerash bëhet e ditur: “Gjatë qëndrimit dyditor, kryeministri Kurti do të takohet me deputetë dhe kryesues të grupeve kryesore politike të Parlamentit Evropian dhe Presidenten e Parlamentit Evropian, Roberta Metsola.”
Discussion about this post