Rreth 50 banesa janë përmbytur vetëm në një nga zonat e Shkodrës, në Bërdicë si pasojë e reshjeve intensive gjatë ditës së djeshme pothuajse në gjithë vendin.
Mësohet se ushtria dhe Emergjencat Civile kanë zbarkuar në terren për të mobilizuar familjet që janë prekur nga përmbytjet masive. Administratori i kësaj zone ka bërë me dije se është bërë i mundur evakuuimi i 20 familjeve.
“Që dje pasdite bashkia Shkodër ka qenë në dispozicion të banorëve të Bërdicës, është bërë i mundur evakuimi i 20 familjeve. Janë përcaktuar familjet në rrezik. Aktualisht vetëm në fshatin Bërdicë e Sipërme janë rreth 50 banesa ku kanë ujë në oborre, një qendër shëndetësore është përmbytur. Një pjesë e këtyre familjeve janë vendosur në konvikte dhe pjesa tjetër pranë familjarëve të tyre. Familjet që janë në rrezik i kemi të përcaktuara. Bashkia Shkodër po bashkëpunon me strukturat e veta për zgjidhjen e mëtejshme të problematikave. Këtu fillon përmbytja e zonës së Berdicës dhe ne shpresojmë të mos kemi jetë njerëzore të rrezikuara, për raste të tjera jemi në gatishmëri të plotë“, tha administratori i Bërdicës.
Prefekti i qarkut Shkodër më herët bëri me dije se në 482 banesa ka prezencë të ujit në oborre dhe brenda tyre. Sakaq janë evakuuar 30 familje në zonat e këtij qarku.
Lexo edhe: Përmbytje e madhe gjatë natës, del nga shtrati lumi Ishëm
Ndërsa problematike shfaqet rruga që lidh fshatrat Pentar- Ças në Njësinë Administrative Velipojë, ku kalimi me mjete të ulëta është i pamundur për shkak të nivelit të lartë të ujit si pasojë e prurjeve gjatë natës.
Discussion about this post