Dëmet nga përmbytjet në Vlorë janë të shumta, dhe çdo qytetar i prekur kërkon një përgjigje dhe një zgjidhje për situatën e tyre emergjente. Të mbuluar nga balta dhe me banesat e papërshtatshme për jetesë, qytetarët janë në nevojë të madhe për ndihmë.
Remzi Limo, një prej banorëve të prekur, shprehet se banesa e tij është përmbytur për herë të pestë. Ai ka telefonuar kryebashkiakun, por nuk ka marrë përgjigje. Ndërsa zjarrfikëset dhe policia kanë arritur me shumë vonesë, duke e lënë atë dhe të tjerët të përballen me situatën të vetëm.
“Jam me dy invalidë, shtëpia është përmbytur, s’kam as motra as vëlla, asnjë njeri s’kam. Ku të vete, ku të mbytem. Shtëpia është e mbushur me ujë e llum. Kjo është e 5-ta herë që përmbytet dhe unë s’kam marrë asnjë majë gjilpëre,” tha Limo me lot në sy.
Ai vazhdoi duke përshkruar dëshpërimin e tij: “Kam marrë kryetarin e bashkisë, nuk më është përgjigjur. Dje morëm policinë dhe zjarrfikëset, na thonin se do vinin, por askush nuk erdhi. Uji jashtë ishte 1.5 metra, brenda ishte 50-60 cm, ne ishim në ujë, askush nuk vinte të na ndihmonte.”
“Jemi në qiell të hapur”
Rënia e gurëve ka shkaktuar dëme në disa banesa në zonën e ujit të Ftohtë, te Kalaja në Vlorë. Dy nga banesat janë shkatërruar tërësisht dhe tashmë janë jashtë funksionit. Banorët e prekur tregojnë se gurët dhe balta kanë hyrë brenda, duke krijuar kushte të papërshtatshme për të qëndruar në banesë.
Banorët tregojnë se në momentin e rënies, ata dolën jashtë për siguri dhe kanë kërkuan ndihmë nga institucionet, por deri tani nuk kanë marrë asnjë reagim. Banorët bëjnë thirrje për ndërhyrje urgjente dhe mbështetje nga autoritetet.
“Hyrja është mbushur plot me baltë, jam me qiell të hapur, nuk di ku të shkoj. Lutem shtetit të më ndihmojë, as rroba nuk kam, na janë tharë në trup”, tha një nga banoret, shtëpia e së cilës është shkatërruar.
Bllokohet Bypass-i i Vlorës
reshjet e dendura të shiut kanë shkaktuar probleme të mëdha edhe në Bypassin e Vlorës, ku ka pësuar dëmtime si pasojë e shembjes së dherave. Ky incident ka ndodhur pasditen e djeshme dhe ka bllokuar qarkullimin e automjeteve për orë të tëra.
Sipas raportimeve, masivi i dheut është spostuar në anë të rrugës, duke penguar kalimin e automjeteve. Pamjet e publikuara nga vendi i ngjarjes tregojnë masat e marra për të hapur qarkullimin, ndërsa autoritetet po punojnë për të riparuar dëmet e shkaktuara.
Shembja ka ndodhur në segmentin që lidh Vlorën me Kaninën dhe Orikumin, dhe për shkak të rënies masive të dherave nga shpatet e malit, rruga ka qenë e bllokuar për një kohë të gjatë. Autoritetet lokale po monitorojnë situatën dhe po ndërhyjnë për të siguruar kalimin e sigurt të automjeteve.
gijotina.com/
Discussion about this post