Përmbytje në Greqi/ Pamje apokaliptike nga ishulli, mister fati i një gruaje të zhdukur

Ishulli i Kretës në Greqi është përfshirë nga moti i keq. Si pasojë e përmbytjeve që shkaktuan reshjet e shiut, humbi jetën 50-vjeçar. Rrugët u kthyen në “lumenj”, prona dhe dyqane u shkatërruan, ndërsa në të njëjtën kohë ankthi po arrin kulmin për një grua te zhdukur, e cila udhëtonte në të njëjtin mjet me fotografin 50-vjeçar Konstantinos Vergakis , i cili pësoi një vdekje tragjike.

50-vjeçari u gjet i vdekur në makinën e tij që u bllokua në kanalin e përmbytjes, ndërsa një grua, qe kishte shkuar në punë me të dhe ishte pasagjere në mjetin e tij, rezulton e zhdukur. Në kërkimin e saj janë përfshirë edhe zhytës dhe operacioni është shtrirë edhe në det. Ekipet e shpëtimit po kërkojnë gjithashtu persona të bllokuar brenda makinave që janë larguar. Qindra telefonata janë marrë nga zjarrfikësit që nga mëngjesi i djeshëm kur filluan reshjet e shiut.

Sot nisën sërish kërkimet për 49-vjeçaren e zhdukur , e cila dyshohet se po udhëtonte në të njëjtën makinë me fatkeqin Vergakis.

Guvernatori rajonal i Kretës, Stavros Arnautakis , i cili ishte në vendngjarje që në momentin e parë, flet për imazhe të shkatërrimit biblik.

“Brenda 45 minutash kanë rënë 70 milimetra ujë, dukuri të cilat i kalojnë 100 vjetët. Pra, çfarëdo studimi të kishte, asgjë nuk mund të parashikohej . ”

Një tjetër shofer në plazhin e Lygaria ishte më me fat. E gjetën në kohë ekipet e shpëtimit dhe e nxorrën nga makina e saj, pikërisht teksa kishte arritur në det dhe po goditej nga dallgët e furishme.

Gjithçka ka ndodhur në një kohë të shkurtër pasi pak pas orës 11.00 të mëngjesit të së shtunës ka rënë një shi i dendur, i cili ka zgjatur rreth dyzet minuta. Mjaftoi që rrugët të ktheheshin në përrua. Makinat rrëshqisnin dhe, u grumbulluan njëra mbi tjetrën dhe disa arritën në det, ndërsa të tjera shpëtuan në momentin e fundit. Infrastruktura u shkatërrua, dyqanet dhe shtëpitë u zhytën në baltë dhe ujë.

I mbyllur ka mbetur edhe aeroporti “Nikos Kazantzakis” në Heraklion ndërsa rrugët përreth tij janë kthyer në liqene. Rrëshqitje dherash dhe vështirësi në lëvizjen e mjeteve vërehen edhe në aksin rrugor verior.