Kryeministri i Kosovës, Albin Kurti ka dënuar stërvitjet ushtarake me helikopter të Serbisë pranë kufirit me Kosovën, të zhvilluara një ditë më parë, duke e cilësuar si provokim të hapur ndaj shtetit të tyre të pavarur, ndërsa kërkon edhe reagimin e faktorit ndërkombëtar.
Kurti u shpreh se institucionet e Kosovës mbeten vigjilente dhe të gatshme pët t’u përballur me çdo kërcënim, ndërsa shtoi se “është koha që komuniteti ndërkombëtar të ndëshkojë këtë qasje destabilizuese të Serbisë që kërcënon drejtpërdrejt sigurinë dhe paqen rajonale”.
“Këto provokime në afërsi të brezit kufitar në Karaçevë nga njësia e brigadës 63 e parashutistëve të Serbisë, përmes stërvitjeve me helikopterë H145M dhe kërcënimeve me parashutë disa metra larg kufirit me Republikën e Kosovës, përbëjnë një shfaqje të rrezikshme të agresionit. Kjo shfaqje bëhet edhe më alarmuese kur kujtojmë se e njëjta njësi ka trajnuar dhe mbështetur grupin e kriminelit Milan Radoiçiç, të cilët realizuan sulmin agresor e terrorist në fshatin Banjskë të Zveçanit, kur vranë rreshterin policor, Afrim Bunjakun – heroin e Kosovës”, tha Kurti.
Sipas Kurtit, këto lëvizje ushtarake, kombinuar me retorikën nxitëse të presidentit serb Aleksandër Vuçiç se Serbia po përgatitet për një sulm të mundshëm nga aleanca Kroaci-Shqipëri-Kosovë, si dhe blerja e armatimit kinez dhe rus, konfirmojnë se shteti armik fqinj po e përdor Rusinë si mjet shantazhi për ta mbajtur rajonin e Ballkanit nën tension të vazhdueshëm.
“Beogradi po e shfrytëzon këtë moment për ta sfiduar gatishmërinë e institucioneve vendore dhe ndërkombëtare të sigurisë dhe në përgjithësi stabilitetin e Ballkanit Perëndimor, sipas interesave të Serbisë dhe aleatëve të saj Rusisë dhe Iranit, që duan të kenë trazira, konflikte dhe paqëndrueshmëri gjithandej”, shtoi më tej Kurti.
Discussion about this post