Presidenti Ilir Meta ka reaguar lidhur me situatën e përmbytjeve në vend, ku për shkak të reshjeve të shumta Lumi Vjosa dhe Semani kanë dal nga shtretërit duke përmbytur disa fshatra dhe izoluar banorët. Meta shprehet se po ndjek me vëmendje situatën e krijuar dhe mënyrën si po menaxhohet ajo. Meta ka treguar gjendjen në disa zona problematike në Levan dhe në zonën e Mifolit ku qindra hektarë tokë janë përmbytur.
“Jam duke ndjekur me vëmendje të veçantë situatën kritike të krijuar, si pasojë e motit të keq dhe masat që po merren për tejkalimin e saj në disa zona të përmbytura dhe të bllokura nga reshjet e borës.
Jam informuar se situata paraqitet më problematike në Qarkut e Fierit, sidomos në njësinë administrative Levan, fshatin Ferras, ku janë evakuuar 15 familje dhe qindra hektarë tokë bujqësore, ndodhen nën ujë.
Përmbytje të shumta ka edhe në Qarkun e Vlorës, sidomos në zonën e Mifolit ku sipërfaqja e përmbytur e tokës bujqësore i kalon mbi 1200 hektarë, ndërkohë që shumë fshatra në Lumin e Vlorës rezultojnë të izoluara.
Gjithashtu në Veri, Veri-Lindje dhe Jug-Lindje të vendit shumë zona rezultojnë sot të bllokuara nga reshjet e shumta të borës”, shkruan Meta.
Presidenti Meta akuzon autoritetin e Mbrojtjes Civile se nuk ka njoftuar banorët e zonave të rrezikuara nga përmbytjet, ndonëse IGJEUM prej disa ditësh ka njoftuar këtë situatë. Meta iu bën thirrje institucioneve të anagazhohen maksimalisht për të siguruar jetën e qytetarëve dhe pronave të tyre.
“Problematik është fakti se ashtu si në të kaluarën, autoritetet e Mbrojtjes Civile dhe Prefekturat nuk e kanë njoftuar më herët popullatën në zonat me risk të lartë, lidhur me parashikimin e hershëm sipas IGJEUM, që prej ditësh ka njoftuar autoritetet shtetërore në lidhje me parashikimin e motit.
Duke u solidarizuar me banorët e prekur nga pasojat e motit të keq, u bëj thirrje të gjithë institucioneve përgjegjëse shtetërore të angazhohen maksimalisht për sigurinë e jetës dhe të pronës”, shkruan Meta.
Discussion about this post