Gjykata e Lezhës ka dënuar me 10 vite e 9 muaj burg, Mhill Gega, pasi ka përplasur për vdekje Mark Gjetën. Ngjarja rëndë ka ndodhur në muajin shkurt të këtij viti, pasi 60-vjeçari përplasi me makinë Gjetën në fshatin Bungaj të Mirditës, duke e lënë të pajetë.
Dy bashkëfshataret kishin pasur konflikte prej dy vitesh me njëri-tjetrin dhe ditën e ngjarjes janë përplasur sërish. Pas debateve, 60-vjeçari Mhill Gega ka shkuar në shtëpi dhe ka marrë automjetin tip “Benz” dhe përplasur për vdekje Mark Gjetën, i cili lëvizte në rrugën e fshatit.
Në deklarimet e tij i pandehuri ka pranuar faktin se ka pasur konflikte me viktimën, por ka mohuar akuzën e ngritur ndaj tij duke e konsideruar ngjarjen aksidentale, me pretendimin se i kishte rrëshqitur makina dhe ka goditur 68-vjeçarin Mark Gjeta.
Më pas ngjarja është zbuluar nga organet kompetente se ka qenë e qëllimshme, pasi më parë Gjeta dhe Gega kanë qenë kolegë duke punuar në të njëjtën ndërmarrje mirëpo marrëdhëniet e tyre nisen të acarohen për motive tërësisht banale, pasi viktima e tallte dhe ofendonte autorin. Kjo ka bërë që Gega të ndërmarrë aktin e rëndë, duke e përplasur me mjet për ta lënë më pas të pajetë.
