Shkëlqim Leskaj, ish drejtori i Ujësjellës Kanalizimeve në Vlorë, nuk liron zyrën e drejtorit, ndonëse ka dhënë dorëheqjen.
Përmes një deklarate për mediat, “UKV” deklaron se Shkëlqim Leskaj vijon që të jetë në krye të detyrës, dhe puna po ecën normalisht në qytetin bregdetar.
“Ndërmarrja e Ujësjellës Kanalizime Vlorë ju bën me dije se nuk ka asnjë ndërprerje të veprimtarisë së Shoqërisë Ujësjellës Kanalizime Vlorë, duke vijuar realizimin normalisht të të gjitha detyrave në shërbim të qytetarëve dhe klientëve tanë, si familjarë ashtu edhe privatë. Drejtori Shkëlqim Leskaj është në krye të detyrës, duke ushtruar kompetencat e tij.”.
Sipas njoftimit, Leskaj vijon të qëndrojë në detyrë dhe të jetë i regjistruar pranë QKR si subjekt si subjekt i legjitimuar në cilësinë e Administratorit të Shoqërisë.
“Zoti Shkëlqim Leskaj vijon të qëndrojë në detyrë, brenda të gjitha tagrave që i atribuohen sipas legjislacionit në fuqi. Zoti Leskaj, vijon të jetë i regjistruar pranë QKR, si subjekt i legjitimuar në cilësinë e Administratorit të Shoqërisë”.
Ndër të tjera, ata kanë hedhur poshtë akuzat për tendera, duke thënë se Leskaj e ka drejtuar punën me përkushtim.
“Gjatë kësaj periudhe nga ana e Shoqërisë Ujësjellës Kanalizime Vlorë dhe administratorit të saj, nuk janë nënshkruar kontrata tenderuese për kontratorët matës së ujit (sahatët), klorinimin dhe uniformat e punonjësve. Gjatë një viti në krye të Ujësjellës Kanalizime Vlorë, Zoti Shkëlqim Leskaj ka drejtuar me përkushtim të plotë në drejtim të shërbimit ndaj qytetarëve, duke qenë maksimalisht i angazhuar dhe i pranishëm kudo në terren, edhe jashtë orarit zyrtar, përfshire edhe orët e vona të natës, për tu dhënë zgjidhje efektive dhe në kohë sa më të shkurtër të gjitha problematikave të shfaqura në rrjetin e ujësjellësit dhe të kanalizimeve”.
Konflikti nis më 6 gusht, datë kur Shkëlqim Leskaj ka firmosur dorëheqjen nga detyra e drejtorit të Ujësjellësit të Vlorës. Por disa ditë më pas, Leskaj është penduar duke kërkuar që ta kthejë mbrapsht, por kryetari i bashkisë së Vlorës nuk e ka pranuar, duke i qëndruar vendimit të parë të drejtorit të UKV-së.
Por, Leskaj pavarësisht se dha dorëheqjen nuk mund të largohej në gusht pasi mori lejen vjetore dhe për këtë arsye është pritur data e rikthimit për t’i komunikuar procedurën.
Në datë 15 shtator, drejtorit iu kërkua që të lironte zyrën, por Leskaj e ka refuzuar kërkesën duke mos pranuar madje duke e kyçur derën.
Kjo ka bërë që konflikti mes palëve të përfundojë në drejtorinë e policisë së Vlorë, që ditën e djeshme ka thirrur Lelin dhe Leskajn për t’u marrë dëshminë mbi ngjarjen.
