Në seancën plenare të ditës së sotme, u regjistrua përplasja e parë publike mes deputetes socialiste Sara Mila dhe atij demokrat, Besart Xhaferi. Debati nisi pas një komenti të Xhaferit, i cili e ironizoi Milën, duke përmendur rezultatin e saj zgjedhor në burgun e Elbasanit.
“E uroj një legjislaturë të mbarë, por e ka nisur gabim. Nga dole më e votuara e burgut? Kjo është një pyetje që e presin të gjithë qytetarët e Elbasanit”, u shpreh Xhaferi nga foltorja e Kuvendit.
Deputetja socialiste nuk hezitoi të replikojë, duke u shprehur se ishte e zhgënjyer nga niveli i debatit dhe mënyra si Xhaferi po e përdor mandatin.
“Jam pak e çuditur por dua të them se jam e zhgënjyer nga Besarti sepse kam menduar se do sillte standard tjetër. Ai ka qenë në listë të mbyllur dhe nuk i di ethet e garës, se e ka marrë falas këtë karrige. Mos merr leksione nga Noka dhe Bardhi sepse s’di ta bësh dhe mirë është mos ta bësh”, deklaroi Mila me tone ironike.
Seanca vijoi mes tensioneve të zakonshme, me akuza dhe replikime mes përfaqësuesve të mazhorancës dhe opozitës.
Discussion about this post