Zbardhet plagosja e kryebashkiaut të Divjakës mëngjesin e sotëm ku Orges Xhelili, një ish punonjës i Bashkisë qëlloi me thikë kryetarin Fredi Kokoneshin dhe shoferin e tij Gazmir Bullarin 45 vjeç.
Mësohet se, konflikti ka nisur në mjediset e parkimit të Bashkisë Divjakë aty ku Kokoneshi shoqëruar nga shoferi i tij Bullari kanë zbritur nga makina, ku i priste autori i ngjarjes Orges Xhelili.
Konflikti ka nisur me një sherr verbal mes Kokoneshit dhe Xhelilit, më pas ka ndërhyrë shoferi i kryebashkiakut. Në këtë moment autori ka nxjerrë një thikë që mbante me vete me të cilën ka qëlluar kreun e Bashkisë në zonën e krahut të shpatullës, dhe në sherr e sipër edhe shoferin e tij në zonën e barkut e në brinjë.
Menjëherë të dëmtuarit janë transportuar në spitalin e Lushnjes, ndërsa bluzat e bardha janë njoftuar nga një punonjës i Bashkisë i cili u ka dhënë edhe ndihmën e parë.
Burime nga Spitali i Lushnjes bëjnë me dije se gjendja shëndetësore e Fredi Kokoneshit është e stabilizuar, ndërsa shoferi i tij i është nënshtruar ndërhyrjes kirurgjikale.
Lexo edhe: FOTO/ Ky është personi që plagosi me thikë kryebashkiakun e Divjakës
Ndërkohë nga hetimet paraprake dyshohet se sherri mes Kokoneshit dhe Xhelilit ka nisur kohë më parë, kur autori është larguar nga puna ku ka punuar si specialist IT.
Ndërkohë kohët e fundit edhe bashkëshortja e autorit, mjeke në Poliklinikën e Divjakes, më parë ka mbajtur pozicionin e shefes se poliklinikës duke ulur në detyrë.
Ndërsa të tjera të dhëna bëjnë me dije se mes Kokoneshit dhe autorit ka edhe një konflikt pronësie, pasi Bashkia për interesa publik kërkon të shpronësojë vjehrrin e autorit, duke mos gjetur dakordësinë. Autori i ngjarjes është arrestuar fill pas saj.
Discussion about this post