Lulzim Basha dhe Gazment Bardhi kanë vijuar edhe sot përplasjen mes tyre, ndërkohë që ka një tentativë për të unifikuar qëndrimet e deputetëve demokratë, pavarësisht vendimeve të mëparshme për përjashtime apo ngrirje të tyre nga Grupi Parlamentar.
Dy ditë më parë, Lulzim Basha, përmes delegatëve të një Kuvendi të thirrur prej tij, miratoi ndryshime statutore që i japin të drejtën Kryetarit të partisë që të jetë edhe kryetar i Grupit Parlamentar.
Gazment Bardhi dhe mbështetësit e tij, të paktën 18 deputetë, nuk njohin as Kuvendin Kombëtar të thirrur nga Basha dhe as statutin e ri, që po tentohet të zbatohet në atë që njihet si PD e vulës.
Në anën tjetër, Sali Berisha ka konfirmuar pjesëmarrjen në një takim të thirrur nga Bardhi për të bashkuar qëndrimet e deputetëve demokratë, kundër qeverisjes së Edi Ramës.
Po sa e mbështesin ndërkombëtarët apo diplomatët në Tiranë tentativën e Gazment Bardhit, në një kohë kur Lulzim Basha në anën tjetër ka deklaruar se nuk do të ketë asnjë bashkëpunim me “non grata-t”, duke pasur parasysh këtu Berishën, i cili ka rreth vetes 16 deputetë dhe shumicën e anëtarëve të PD-së?
Sipas Bardhit, ndërkombëtarët kërkojnë një opozitë të fortë dhe të qëndrueshme dhe ai personalisht shkon në linjë të plotë me qëndrimet pro amerikane dhe pro perëndimore.
“Qëndrimi im në raport me partneritetin strategjik të Partisë Demokratike, me Shtetet e Bashkuara të Amerikës, Britaninë e Madhe dhe vendet e Bashkimit Europian ka qenë dhe do të mbetet i palëkundur.
Gjatë gjithë këtyre ditëve kam qenë në kontakt të vazhdueshëm me partnerët për situatën në të cilën ndodhet opozita. Interesi i partnerëve strategjikë të Shqipërisë është që Shqipëria të ketë një opozitë të fortë.
Kush mendon që qëndrimi i partnerëve tanë strategjikë është që opozita të jetë e copëzuar, jo e fortë, jo funksionale gabon rëndë sepse është duke çuar vendin në frymë jo perëndimore.
Nuk ka vend perëndimor që ka një opozitë jo funksionale”, u shpreh Bardhi.
Discussion about this post