Kreu i PD, Sali Berisha, ka reaguar pas deklaratës së Marta Kos, e cila u shpreh se “zgjedhjet në Shqipëri ishin të lira”.
Berisha tha se Partia Demokratike e ka dënuar publikisht këtë deklaratë, duke e cilësuar si të frymëzuar nga propaganda e paguar e kryeministrit Edi Rama dhe nga ekstremizmi i majtë.
Sipas tij, deklarata e Kos përbën një shkelje të rëndë të ligjit të zgjedhjeve dhe ligjit kombëtar.
Ai shtoi se ka pasur një reagim nga ana e zëdhënësit të Komisionit Europian, i cili ka shprehur një qëndrim të papajtueshëm me atë të zonjës Kos. Berisha e cilësoi Marta Kos si “një adhuruese pa kushte të Edi Ramës”.
“PD pas deklaratës së Marta Kos, bëri një deklaratë në të cilën ajo e publikisht dhe gjerësisht, deklaratën e frymëzuar të zonjës Kos, nga propaganda e paguar e Edi Ramës, ekstremizmit politik i majtë apo dizinformimi, si një deklaratë që shkel rëndë ligjin ndërkombëtar të vlerësimit të zgjedhjeve dhe ligjin kombëtar.
Ajo çka unë dua të them, sot lexova para se të vij këtu, se ka patur një reagim nga ana e zëdhënësit të Komisionit Europian, i cili shpreh qëndrimin korrekt të Komisionit Europian të papajtueshëm me qëndrimin e Marta Kos, një adhuruese pa kushte për arsye të saj, të Edi Ramës dhe bëmave, gjëmave të tij.
Ndaj dhe unë falënderoj Komisionin për reagimin dhe garantoj se PD mbetet e përkushtuar totalisht për procesin e integrimit të Shqipërisë në BE si e ardhmja më e shkëlqyer për shqiptarët.
Sikundër thekson se sot Shqipëria në mënyrë absolute përveç pozicionit gjeostrategjik, nuk plotëson asnjë nga kushtet dhe kriteret që kërkohen për këtë anëtarësim”, u shpreh Berisha.
Discussion about this post