Ditën e djeshme me dhjetëra banorë në Rinas dolën në protestë dhe bllokuan rrugën në shenjë revolte, pasi nuk janë dakord me vendimin e Bashkisë Tiranë për devijimin e kalimit të rrugës për në aeroport. Ndërkohë, bëhet me dije se ditën e sotme protesta pritet të jetë edhe më e madhe, për shkak se banorëve të Niklës do t’u bashkohen protestuesve të Rinasit
Mësohet se ata do të dalin sot në orën 10:00 në protestë për t’ju bashkuar banorëve të zonës së Rinasit dhe fshatrave përreth. Protesta do të mbahet në segmentin rrugor përballë shkollës së Rinasit nga ora 10:00 në 12:00.
Ditën e djeshme, për dy orë me radhë, banorët e Rinasit e të fshatrave përreth u përplasën me policinë, pasi bllokuan rrugën për të kundërshtuar vendimin e Autoritetit Rrugor Shqiptar. Banorët e shqetësuar thonë se nëse nuk ka zgjidhje do të vijojnë edhe ditët e tjera. Disa ditë më parë, ARRSH vendosi se qarkullimi drejt Aeroportit do të realizohej me një sens lëvizje me drejtimin nga Qafë Kashari- Rrethrrotullimi i “Nënë Terezës”-Ahmetaq, deri në rehabilitimin e aksit rrugor. Mjetet që vijnë nga veriu për në Rinas duhet të ndjekin lëvizjen Fushë Krujë-Vorë-Qafë Kashar-Aeroport.
Discussion about this post