Ka ndërruar jetë shoferi i mjetit tip Volksëagen, i cili pësoi infarkt në timon gjatë drejtimit të makinës dhe u përplas me një Benz.
Ai u dërgua në spital, por nuk arriti që të mbijetonte.
Ngjarja ndodhi mëngjesin e sotëm në Bulevardin ‘Republika’ në Korçë.
Në një prononcim për mediat në vendin e aksidentit, Zëvendës Drejtori i Rendit në DVP Korçë, Bedri Hasanaj, ka ofruar informacion në lidhje me ngjarjen e rëndë që ndodhi mëngjesin e sotëm në Bulevardin “Republika”.
Hasanaj ka sqaruar se rreth orës 9:50, dy automjet; një Volkswagen dhe një Mercedes Benz, janë përplasur në këtë zonë. Sipas tij, aksidenti ka ndodhur kur drejtuesi i Volkswagen-it, Julian Tusho, ka humbur kontrollin e mjetit të tij dhe është devijuar në korsinë e kundërt, ku është përplasur me automjetin Benz, i cili ishte ndalur plotësisht.
“Drejtuesi i Volkswagen-it ka pësuar një infarkt miokardi dhe ka humbur kontrollin e mjetit, çka ka çuar në përplasjen fatale. Pas aksidentit, është marrë masa për transportimin e tij në urgjencë, por ai ka ndërruar jetë në spital,” tha Hasanaj.
Ai gjithashtu konfirmoi se, sipas informacionit paraprak, drejtuesi i Mercedes Benz nuk kishte konsumuar alkool dhe aksidenti ishte shkaktuar nga problemi shëndetësor i drejtuesit të Volkswagen-it. Policia rrugore ka marrë masat e nevojshme për të sqaruar të gjitha rrethanat e aksidentit dhe për të menaxhuar situatën në vendngjarje.
Hasanaj përmendi se ka pasur pak panik tek qytetarët, por ndërhyrja e menjëhershme e forcave të rendit ka ndihmuar në qetësimin e situatës dhe në sigurimin e zonës për të lehtësuar hetimet dhe ndihmën për të prekurit.
Discussion about this post