Ministri i Drejtësisë, Ulsi Manja, është përgjigjur se nuk do të ketë amnisti për 200 të burgosurit që vuajnë dënimin në burgun e Shkodrës.
“Nuk do ketë amnisti për të burgosurit” tha ai në një takim me gazetarët.
Të burgosurit e Shkodrës mblodhën 200 firma në një peticion me pretendimin se janë viktima të një sistemi të korruptuar, ku janë favorizuar personat me para, të burgosurit i janë drejtuar përmes një shkrese kryeministrit Edi Rama, kryetares së Kuvendit Lindita Nikolla si dhe ministrit të Drejtësisë Ulsi Manja.
Në peticion theksohet se dënimi që ato po kryejnë është i padrejtë, pasi ndihen viktima të sistemit gjyqësor të paaftë e të korruptuar. Në peticionin e nënshkruar nuk mungojnë as akuzat për lirime apo dhënie të vendime të ulëta kundrejt rryshfetit.
Megjithatë të dënuarit e Shkodrës pretendojnë për një amnisti të përgjithshme që sipas tyre lind si pasojë e rezultateve të vettingut. Deri më tani nga lista e gjyqtarëve dhe prokurorëve që kanë kaluar në verifikimin e pasurisë dhe figurës, rreth 60 për qind janë shkarkuar ose kanë dhënë dorëheqjen.
Vendimi i fundit për amnisti ka qenë i vitit 2019, kur 175 gra të mitur e të moshuar përfituan nga ulja e dënimit.
Discussion about this post