Sezoni i ri ka nisur në mënyrë mjaft të keqe për Charles Leclerc dhe Ferrarin, me pilotin nga Monako që ka grumbulluar vetëm 6 pikë në tre gara.
Duket se kjo gjë mund të sjellë dhe fundin e 25-vjeçarit te Ferrari, gjë që e ka bërë të ditur drejtori i Red Bull, Helmut Marko.
Austriaku shprehet se ekziston një klauzolë për pilotin e parë të Ferrarit që bazohet te pikët e grumbulluara në një sezon.
Në një intervistë për “Sport Bild”, ai shprehet: “Për Ferrarin që të humbasë Karlos Sainzin, i cili po bën mirë këtë sezon, do të ishte një problem i madh.
Ndryshe do të ishte për Charles Leclerc, i cili mendoj se ka një kontratë që bazohet te pikët. Pak a shumë është diçka që lidhet me pikët e fituara përpara pushimeve të verës, që të lejon më pas të prishësh kontratën me skuadrën aktuale.
E njëjta gjë ndodhi dhe me Sebastian Vetel që shkoi nga Red Bull te Ferrari”.
Sainzit dhe Leclercut i skadon kontrata në fund të vitit 2024, por nëse monegasku nuk grumbullon pikët e nevojshme atëherë ai mund ta prishë kontratën, teksa mediat përflasin për një kalim të mundshëm të tij te Mercedes për të zëvendësuar Lewis Hamilton, në rast se ky i fundit vendos që të shkëputet nga garat në fund të sezonit.
Discussion about this post