Ashtu si pjesa dërrmuese e kolegëve të tij, edhe kryebashkiaku i Lezhës, Pjerin Ndreu, ka blerë pa garë karburantin e gjithë vitit 2024. Janë 625 milionë lekë të planifikuara, por mund të ishin harxhuar më pak, nëse në tender do të merrnin pjesë më shumë se një kompani.
Në dokumentet standarde të tenderit përshkruhet se kjo naftë do të blihet për të gjithë vitin dhe për të gjitha institucionet në varësi të bashkisë Lezhë, por kemi parë vazhdimisht drejtoritë dhe institucionet që bëjnë gjatë vitit tendera të veçuar për naftë.
Ndreu po shpenzon 625 milionë lekë për të blerë benzinë dhe naftë, por 5.5 milionë lekë do të shkojnë vetëm për nevojat e stafit të bashkisë për karburant. Dhe kjo blerje është bërë përmes dy prokurimeve.
Tenderi i parë ka si objekt ‘Blerje GAZOIL =10PPM, për nevoja të Bashkisë Lezhë’ dhe është zhvilluar më datë 12 prill 2024, me fond limit 605milionë lekë. Sikurse shihet në dokumente, deri në atë ditë ishte paraqitur vetëm oferta e firmës “LINDA-80” Shpk, në pronësi të Nikoll Marnikollajt. Kjo firmë kishte prezantuar një ofertë 595 milionë lekë, pra sa 99% e fondit limit. Ky fakt duhej marrë parasysh si një rregull që shkelet, pasi prokurimet duhet të marrin në konsideratë ofertat më të lira.
Është e vërtetë, që ndryshimi i bërë në ligj i lejon tenderat me një kompani, por në këtë rast duket haptazi se është abuzuar me nenin përkatës. Pjerin Ndreu duhej ta anulonte tenderin dhe të priste pjesëmarrjen e më shumë kompanive nga sektori i karburanteve. Zakonisht ka mungesë pjesëmarrje të operatorëve kur fituesi është paracaktuar dhe nuk ia vlen të futesh në “listën e zezë” të bashkisë si autoritet kontraktor.
“LINDA-80” Shpk nuk kishte asnjë konkurrent përballë dhe rezulton që tenderi është mbyllur pa garë dhe me ofertë shumë të shtrenjtë. Për këtë, kjo kontratë ka marrë nga Open Data ‘Flamur të kuq’, që është tregues i riskut të korrupsionit.
Ndreu e ka publikuar më 19 prill 2024 kontratën që ka nënshkruar me fituesin dhe e ka regjistruar në APP. Agjencia e ka bërë kalimin në sistem pa asnjë kontroll dhe kështu paratë shpenzohen pa asnjë kontroll.
20 milionë lekë për benzinë
Pavarësisht shkeljeve që japin alarmin e kuq, Ndreu ka vazhduar të nxjerrë para nga arka e bashkisë me të njëjtën metodë. Në të njëjtën ditë kryetari ka nënshkruar kontratën për prokurimin me objekt ‘Blerje Benzine (Premium Unl 10ppm), që gjithashtu blihet për nevojat e Bashkisë Lezhë, për 12 muaj.
Edhe për këtë tender ka paraqitur ofertë vetëm firma “LINDA-80” Shpk. Këtu përsëritet e njëjta skemë, sërish kompania në fjalë ka paraqitur një ofertë sa 98% e fondit limit. Përballë saj nuk kishte asnjë konkurrent dhe kryetari Ndreu, duke pasur vetëm një zarf mbi tavolinë, ka firmosur kontratën. Edhe ky prokurim vlerësohet me ‘Red Flag’ nga Open Data, për shkak të parregullsive.
Nga ana tjetër, na tërheq vëmendjen fakti se kompania përfituese “LINDA-80” Shpk është specializuar për transport udhëtarësh. Nga kërkimi që bëri Gijotina.com në QKB, del se kompania nuk ka licencë për tregtinë me shumicë apo pakicë të karburanteve.
Pra, kemi në kushtet kur kryetari Ndreu ia ka dhënë tenderin një kompanie që nuk e garanton sigurinë e furnizimit për shkak të këtyre mungesave.
Ndreu në deklaratat e tij ka qenë përkrahës i SPAK-ut për të goditur të korruptuarit, për vetingun në polici, por ka ardhur koha të hetohen shpërdorimet në bashkinë e tij. “Ne do shkojmë si nuse para SPAK për të dhënë llogari për çdo gjë që kemi bërë”, është shprehur Ndreu kur nisi të zbatohet reforma në drejtësi.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post