Plagosi fqinjët në Rrogozhinë, vetëdorëzohet autori (Emrat)

Autori i plagosjes së çiftit të bashkëshortëve në fshatin Gosë të Rrogozhinës është vetëdorëzuar në polici.

Shpëtim Osmani, rreth 56 vjeç, dyshohet se ka qëlluar me armë zjarri në drejtim të fqinjit të tij, Sami Disha, gjithashtu rreth 56 vjeç.

Për pasojë, Disha ka mbetur i plagosur dhe është dërguar me urgjencë në spital, ku po merr trajtim mjekësor.

Gjithashtu e plagosur nga konflikti ka mbetur edhe bashkëshortja e Sami Dishës.

Ditën e sotme konflikti mes dy fqinjëve degjeneroi në përdorim armësh në fshatin Gosë të Rrogozhinës.

Ngjarja ndodhi për motive të dobëta, konkretisht për çështjen e një qeni.

Pas ngjarjes autori u arratis. Por arratia e tij zgjati pak, pasi rreth një orë pas konfliktit me armë ai u vetëdorëzua në Policinë e Rrogozhinës.

Qeni që lehte nëpër lagje ka qenë burimi i konfliktit në fshatin Gosë të Rrogozhinës, që çoi në plagosjen e një çifti.

Shpëtim Osma u arrestua nga policia pasi plagosi me armë zjarri Sami dhe Nadire Dishën këtë të premte.

Sipas grupit hetimor, nga dëshmitë e deritanishme, shkak i konfliktit mes autorit dhe dy të plagosurve është bërë qeni i këtyre të fundit.

Mes autorit të dyshuar dhe familjes Disha përgjatë ditëve të fundit kishte pasur konflikte të vazhdueshme. Fillimisht debati ka nisur për bagëtitë e familjes Disha, që kishin hyrë në territorin e fqinjit. Në debat e sipër, kryefamiljari Disha ka lënë të lirë qenin, që e mbante për ruajtjen e bagëtive. I shqetësuar nga kafsha, Osma fillimisht ka qëlluar për të vrarë qenin, por plumbat kanë kapur pjesëtarët e familjes Disha.

Sipas dëshmisë së autorit të dyshuar, qëllimi i tij nuk ka qenë të plagoste fqinjët, por të qëllonte qenin që e konsideronte të rrezikshëm.

Tre prej plumbave prekën kryefamiljarin S. Disha. Një plumb preku bashkëshorten e tij, ndërsa e bija pësoi gërvishtje. Të plagosurit ndodhen në spital, fatmirësisht jashtë rrezikut për jetën.