Plagosja e 22-vjeçarit në Pogradec/ Policia prangos një tjetër person

Është finalizuar me sukses operacioni policor i koduar “Gjurmimi”, i zhvilluar nga Komisariati i Policisë Nr. 2.

Policia ka arrestuar një tjetër person, si të përfshirë në plagosjen e Johan Muçllarit, disa javë më parë në Pogradec.

Në kuadër të këtij operacioni u bë kapja dhe ndalimi i shtetasit B. B., 33 vjeç banues në Pogradec.

Ky shtetas ishte shpallur në kërkim, pasi Gjykata e Rrethit Gjyqësor Pogradec i ka caktuar masën e sigurisë “Arrest në burg”, për veprat penale “Moskallëzimi i krimit” dhe “Përkrahja e autorit të krimit”.

Shtetasi B. B., së bashku me 5 persona të tjerë (të arrestuar në flagrancë), nuk kanë kallëzuar në Polici, për ngjarjen e ndodhur më datë 25.04.2022, në qytetin e Pogradecit, dhe kanë përkrahur autorët e krimit, shtetasit F. B., 21 vjeç dhe G. M., 20 vjeç, banues në Pogradec, të cilët gjatë një konflikti, kanë tentuar të vrasin me armë zjarri shtetasin J. M., 22 vjeç, banues në Pogradec.

Veprimet e mëtejshme për këtë shtetas do të kryhen nga Komisariati i Policisë Pogradec.