Ka shkuar në 6 numri i të arrestuarve dhe në 12 i të shoqëruarve në polici pas ngjarjes kriminale që u regjistrua në orët e vona të pasdites së të martës në aksin e rrugës Elbasan-Cërrik në vendin e quajtur “Ura e Zezë” në Papër, ngjarje pas të cilës rezultoi i plagosur i shumë kërkuari Nuredin Dumani.
Në pranga gjithashtu kanë rënë dhe dy mjekë dhe një infermier që i kishin mjekuar plagët Dumanit në një ambient privat pasi akuzohen për moskallëzim krimi. Burime bëjnë me dije se ata kanë shkuar në banesën me qira të Dumanit për t’i mjekuar plagën dhe nuk e kanë denoncuar rastin në polici. Gjithashtu mësohet se në pranga ka rënë dhe një shtetase kosovare, që mendohet të jetë e dashura e Dumanit me të cilën kishte marrë shtëpinë në Fier.
Dumani kishte planifikuar vrasjen e një të afërmi të Talo Çelës, një prej personave më të kërkuar në Shqipëri, autor i grabitjes së mbi 13 milionë Eurove në Rinas, por kur iu afrua fshatit Papër në Elbasan, ai u qëllua me breshëri kallashnikovi dhe mbeti i plagosur.
Nuredin Dumani dhe Talo Çela janë dy nga personat më të kërkuar të drejtësisë. Ata dyshohet se qëndrojnë pas disa vrasjeve që kanë ndodhur nga pranvera e 2020-ës e në vijim, fillimisht si bashkëpunëtor e më pas si kundërshtarë. Dosja kryesore në të cilën Dumani akuzohet si bashkëpunëtor i Talo Çelës, është ajo e vrasjes së dy vëllezërve Haxhia në pranverën e 2020-ës e cila rezultoi të kishte motiv lekët e grabitura në Rinas.
Pas kësaj vrasje, dyshohet se marrëdhënia e tyre u prish, teksa Prokuroria e Elbasanit beson se Dumani është ekzekutor i Bujar Çelës, vëllait të Talo Çelës, ngjarje për të cilën ndodhej në kërkim. Që prej këtij momenti filloi dhe lufta e ashpër mes Dumanit dhe Talo Çelës të cilët dikur ishin miq të ngushtë, madje pjesë e një bande që grabitën dhe eurot në Rinas.
Discussion about this post