Një 39-vjeçar shqiptar, i shpallur në kërkim për një atentat të mbetur në tentativë, është vetëdorëzuar dhe është arrestuar nga autoritetet greke. Ngjarja daton në dhjetor të vitit 2023, kur tre shtetas nga Kreta u plagosën me armë zjarri pas një konflikti jashtë një klubi nate në Gazi.
Siç raporton media greke “Protothema‘, i dyshuari, i njohur me pseudonimin “Nardi”, konsiderohet një figurë kyçe në një rrjet kriminal që operonte në Athinë, duke ofruar mbrojtje për lokale nate. Pas arratisjes në Shqipëri, ai ka negociuar dorëzimin e tij me autoritetet greke dhe tashmë ndodhet përballë drejtësisë.
Artikulli nga media greke
Një 39-vjeçar shqiptar, i shpallur në kërkim për një atentat të mbetur në tentativë, është vetëdorëzuar dhe është arrestuar nga autoritetet greke pasditen e së dielës (16 mars).
Sipas burimeve policore, fillimisht avokati i tij u paraqit në Drejtorinë e Policisë së Athinës (GADA), rreth orës 18:00, dhe pak më vonë mbërriti edhe i kërkuari, i cili u vetëdorëzua. Për disa ditë me radhë, avokati i tij, Spiros Dimitriou, kishte negociuar me policinë për dorëzimin e klientit të tij.
Pas ngjarjes së përgjakshme që ndodhi më 16 dhjetor 2023 në zonën e Gazit, ku tre shtetas nga Kreta u plagosën me armë zjarri jashtë një klubi nate, 39-vjeçari ishte arratisur në Shqipëri, ku qëndroi për një periudhë të gjatë kohore. Pas identifikimit të tij nga autoritetet greke, u lëshua një urdhër-arresti për kapjen e tij.
Ngjarja
Ngjarja ndodhi në orët e para të mëngjesit të 16 dhjetorit 2023, kur një grup prej gjashtë-shtatë të rinjsh nga Kreta po festonin në disa klube nate në Gazi, pasi njëri prej tyre do të martohej së shpejti. Rreth orës 03:00 ata hynë në një klub nate, ndërsa në orën 06:00 dolën dhe shkuan në një piceri për të ngrënë.
Ndërkohë që disa po konsumonin ushqim, një prej tyre vuri re një makinë tip SUV me ngjyrë gri e errët që kaloi pranë tyre. Pas një thirrjeje nga njëri prej të rinjve, automjeti u ndal disa metra më tutje dhe dy persona zbritën prej tij. Njëri prej tyre goditi me shuplakë njërin nga grupi i kretanëve, gjë që shkaktoi reagim nga të tjerët. Në atë moment, personi i dytë nxori një armë zjarri dhe qëlloi drejt tyre, duke plagosur një 28-vjeçar dhe dy vëllezër, që ishin pjesë e grupit.
E shkuara kriminale e 39-vjeçarit
I arrestuari, i njohur me pseudonimin “Nardi”, ishte identifikuar pas hetimeve policore në rajonin e Athinës. Ai konsiderohet një figurë kyçe në një nga gjashtë grupet kriminale të shkatërruara nga policia greke gjatë një operacioni të madh, ku u arrestuan 50 persona dhe u identifikuan 187 të tjerë.
39-vjeçari, me precedent të shumtë penalë, ka qenë aktiv në ofrimin e mbrojtjes për lokale nate në zonën e Gazit, duke u përfshirë në aktivitete të paligjshme dhe rrjete kriminale. Tashmë, ai do të përballet me drejtësinë për akuzat që rëndojnë mbi të.
Discussion about this post