Pesë persona kanë përfunduar në pranga nga Policia e Pogradecit në lidhje me atentatin me armë zjarri ndaj një 23-vjeçari, djali i një biznesmeni të njohur në zonë.
Ndërsa dy autorët që qëlluan me armë ndaj të riut janë ende në arrati, pesë bashkëpunëtorët e tyre përfunduan në pranga. Policia bëri me dije se ka prangosur personat e identifikuar me emrat Fatjon Bono; Kristian Kresto; Hekuran Gjona; Ledion Shkullaku, si dhe Rudi Shaho. Të gjithë të rinjtë, nga mosha 22 deri në 32 vjeç kanë ndihmuar autorët që të largohen nga vendi i ngjarjes nëpërmjet tri automjeteve, të cilat janë sekuestruar nga Policia.
Në këtë mënyrë, autorët e dyshuar të ngjarjes, Firdeus Berberi dhe shoku i tij, Griseld Maxhari, ia kanë dalë të largohen nga vendi i ngjarjes dhe për pasojë t’i shpëtojnë prangave të policisë.
Tri vepra penale rëndojnë mbi të rinjtë e arrestuar “Moskallëzimi i krimit”, “Veprime që pengojnë zbulimin e së vërtetës” dhe “Përkrahja e autorit të krimit”.
Pas aksionit për arrestimin e të rinjve, Policia e Pogradecit ka sekuestruar edhe tri automjete, me të cilat janë larguar nga vendi i ngjarjes. Nga hetimet e policisë ka rezultuar se Fatjon Bono, 32-vjeç, kishte në përdorim një automjet tip “Volkswagen Golf”, i cili sipas policisë është përdorur në ngjarje dhe me anë të së cilës janë larguar fillimisht dy autorët. Ndërkohë, një automjet tip “Benz” dhe një tjetër tip “BMWX5”, kanë transportuar më tej shtetasit Firdeus Berberi dhe Griseld Maxhari. Më shumë se 24 orë pas ngjarjes ku 23- vjeçari Johan Muçllari mbeti i plagosur me plumb në këmbë si dhe me thikë në pjesën e kokës, mbetet mister vendndodhja e autorëve. Policia tha se po vijon intensivisht punën për kapjen e dy autorëve të dyshuar të ngjarjes.
Discussion about this post