Ministrja e Bujqësisë Frida Krifca iu është kundërpërgjigjur ish-zëvendës kryeministrit Erion Braçe, ku tha mëngjesin e sotëm se në ditë pushimi “shërbyesit publik të zyrave shëlleheshin nëpër Palasë”.
Kur të gjithë janë pushim për shkak të shenjtërimit të Nënë Terezës, ministrja e re e Bujqësisë, ka bërë të kundërtën. Ajo ka zbuluar me anë të një fotoje në Facebook, se ndodhet në punë “duke pirë një kafe në ditë pushimi”.
Krifca ka publikuar një foto nga takimi me rektorin e Universitetit Bujqësor të Tiranës, Fatbardh Sallaku.
“Kafe pune në ditë pushimi me Rektorin e Universitetit Bujqësor të Tiranës sepse koha për bashkëpunim është flori!”
Ky është një sulm indirekt për postimin e ish zëvendës kryeministrit, Erion Braçes. I irrituar Braçe tha sot se “Ta dinte Nënë Tereza që shënjtërimi i saj, do ishte ditë pushimi për shtetin e që shërbyesit publik të zyrave do shëlleheshin në Palasë tek Nazuri, në Jalë tek Cmenduria, në Hamallë te Dallga, në gjirin e Lalëzit te 7 fshatrat e Lurës apo në sarajet e çdo oligarku, do vijonte të shërbente kudo për njerëzit e zakonshëm e nuk do ngjitej lart si shenjtë! Me këmbë në tokë! Mirëmëngjes e punë të mbare të gjithë atyre që punojnë sot, nga pastruesit e deri tek infermiere e mjekë në qendrat shendetësore e spitale”.
Frida Krifca u emërua në postin ministres së Bujqësisë ditën e enjte në Asamblenë e PS, kur kryeministri Edi Rama përmendi emrin e saj si pasuese të Milva Ekonomit.
