Kreu i Partisë Demokratike, Lulzim Basha në konferencën e tij të fundit për këtë vit, ka bërë një urim epik për kryeministrin Edi Rama, pas insistimit të gazetarëve për të dhënë një mesazh personal ndaj Berishës, Metës dhe Ramës. Basah ka zgjedhur që të urojë shqiptarët, të cilëve iu tha që viti 2022 do të jetë mjaft i rëndësishëm për një sërë ndryshimeve, ndaj iu kërkoi që të mos humbasin shpresën. Ndërsa në fund të fjalës së tij ai bëri dhe një urim në rrafsh personal për kundërshtarin e tij politik, Edi Rama.
“Urimi im për shqiptarët është që 2022-shi të jetë një vit që të nisim kthimin drejt normalitetit. Në një vend normal që t’u bëjë të mundur të realizojnë ëndrrat dhe shpresat e tyre sipas aftësive dhe dëshirave. Kjo nuk do të arrihet brenda një viti, por 2022 duket si një vit i mbarë për ta nisur, për t’u ndarë nga e keqja 31-vjeçare. PD tani e çliruar nga kjo hije dhe barrë e së shkuarës është e vendosur. Me një reflektim të thellë dhe historik për gjithçka që kemi bërë gabim, me një ripërtëritje vizioni të shpirtit dhe korpusit tonë politik. Të rinjve dhe të rejave dua t’u uroj që viti i ri t’u kthejë besimin te Shqipëria. Këto janë urimet e mia për shqiptarët. Sa për Edi Ramën në rrafshin personal pleqëri të mbarë, në rrafshin politik kurë mos i ardhtë më Shqipërisë një njeri si ai” tha ai.
Basha gjithashtu në fjalën e tij shtoi se përballja e demokratëve është me Ramën dhe jo me njëri-tjetrin. Sipas tij Berisha kërkon të krijojë një celulë anti amerikane për t’u mbrojtur nga non grata.
“Hidhet baltë ndaj meje dhe atyre që nuk ndajnë të njëjtin mendim me zotin Berisha sa i takon flijimit të Partisë Demokratike dhe kthimit të PD në celulë anti amerikane për të mbrojtur atë nga non grata. Përballja e demokratëve do jetë kështu si them unë dhe jo ashtu si thotë Berisha.
Demokratët përballë Ramës dhe jo demokratët përballë njëri tjetrit. Thirrja ime ndaj çdo demokrati është të dëgjoni si flasin me të njëjtat fjalë dhe kuptoni që janë të lidhur me njëri tjetrin ashtu si kanë qenë këto 30 vite. Një ditë na ndan nga viti tjetër. Shqipëria do shpërfillë çdo thirrje për të ndjekur një tollovi për interesat e një personit të vetëm. Demokratët nuk kanë beteja me njëri tjetrin por me Edi Ramën” tha kryedemokrati.
Discussion about this post