Dy familje në fshatin Mbrakull të Poliçanit jetojnë ende në çadra. Edhe pse po bëhen gati dy vjet nga dita ku tërmeti i fuqishëm goditi vendin tonë shumë familje qëndrojnë në çadra. Premtimet e qeverisë mbeten boshe dhe ata deklarojnë se nuk kanë marrë asnjë ndihmë financiare, përveç dy çadrave që ju sollën dhe ku banojnë ende edhe sot.
Albana Kelmendi dhe Ane Leka, shprehen se, po luftojnë çdo ditë me gjarpërinjtë në çadër por askush nuk ka ardhur më në zonë për ti parë, me gjithë ankesat që ato kanë bërë vazhdimisht në bashkinë e Poliçanit.
“Po luftojmë çdo ditë me gjarpërinjtë”, tha Leka.
“Ne jetojmë prej rreth dy vitesh në çadër, siç edhe e shihni shtëpitë tona janë të pabanuara pasi gjithçka është shkatërruar. Muret janë të gjitha të shkatërruara e të çara dhe çatia është e rrëzuar. Pas tërmetit erdhën specialistët, na i vlerësuan të pabanueshme dhe na sollën çadra për tu vendosur. Menduam se kjo do ishte e përkohshme por që nga ajo ditë askush nuk ka ardhur më.
Ne kemi marrë një shkresë nga Ministria përkatëse ku thuhet që jemi përfitues nga fondi i të prekurve nga tërmeti por deri tani nuk kemi përfituar asnjë ndihmë. Kemi shkuar në bashkinë e Poliçanit dhe na kanë thënë se nuk ka ardhur fondi për ta. Ne kërkojmë të na ndërtojnë të paktën një dhomë e kuzhinë ku të fusim kokën sepse po flemë në çadër me frikë nga gjarpërinjtë që na hyjnë brenda”, shprehen Kelmendi e Leka,
Në këtë kuadër ato i bëjnë apel për ndihmë edhe kryeministrit Edi Rama, pasi po vjen dimri dhe nuk mund ta përballojnë dot një dimër tjetër me fëmijët në çadra.
