Banorët e Bërxullës janë mbledhur për të protestuar para Kryeministrisë. Ata thonë se nuk janë kundër projektit të rrugës Thumanë-Kashar, por thonë se duan kompensim me çmimin e tregut.
Me pankarta “Shteti na ka shitur tek koncesionari”, banorët ankohen se po trajtohen si skllevër dhe jo si qytetarë me të drejta të barabarta.
“Na kanë bërë tortura psikologjike, na kanë bërë torturë financiare. Drejtori i Policisë, ministri, kryeministri duhet ta dinë shumë mirë se ne duhet të shpronësohemi sipas ligjit. Ata e kanë detyrim ligjor, që të na sqarojnë, të na bindin dhe të na mbrojnë nga oligarkët. Ne na trajtojnë si bujkrobër, si skllevër. Ja këto janë pushtetarët tanë”, tha njëri prej tyre.
Ata shprehen se nuk do të tërhiqen, por do këmbëngulim me protesta deri sa të marrin dëmshpërblimin që meritojnë.
“Le të bëhet gjaku në gju. Nuk e dorëzojmë tokën dhe as shtëpinë. Pa na dhënë shpronësimin ne nuk e lëshojmë pronën”, shtojnë ata.
Lexo edhe: “Fytyra e armiqve”/ Porti i Durrësit, Rama kapet me opozitën
Discussion about this post