Dy inxhinierë janë arrestuar dhe dy persona të tjerë janë shpallur në kërkim në Delvinë, pasi po ndërtonin pa leje një impiant gazi (TEC) në një pronë publike. Kontrolli u ushtrua nga Policia e Vlorës në bashkëpunim me IKMT dhe Inspektoratin e Mjedisit.
Policia njofton se në pranga ranë përgjegjësi i impiantit të gazit dhe përgjegjësi i kantierit të ndërtimit. Ndërsa në kërkim janë shpallur pronari i kompanisë dhe administratori. Të gjithë akuzohen për “Ndërtim të paligjshëm” dhe “Pushtim të tokës”.
Të arrestuarit janë identifikuar si Elton Malkaj dhe Luan Metaj. Malkaj ishte përgjegjës i impiantit të gazit ndërsa Metaj ishte përgjegjës i kantierit të ndërtimit.
Ndërkohë në lidhje me ngjarjen janë shpallur në kërkim Sokol Meqemaj dhe Juglerd Ibrahimi. Meqemaj është pronar i kompanisë dhe Ibrahimi është administrator.
Njoftimi
Në përfundim të veprimeve të para procedurale, specialistët për Hetimin e Krimeve arrestuan në flagrancë shtetasit: E. M., 31 vjeç, me detyrë përgjegjës i impiantit të gazit, dhe L. M., 53 vjeç, me detyrë përgjegjës i kantierit të ndërtimit, të dy të dyshuar për veprat penale “Ndërtimi i paligjshëm”, me qëllim përfitimi, dhe “Pushtimi i tokës”.
Gjithashtu, u shpallën në kërkim shtetasit: S. M., 56 vjeç, pronari i kompanisë, dhe J. I., 36 vjeç, administratori i kompanisë, të dy gjithashtu të dyshuar për veprat penale “Ndërtimi i paligjshëm”, me qëllim përfitimi, dhe “Pushtimi i tokës”..
Punimet janë bllokuar nga IKMT, ndërsa materialet iu referuan Prokurorisë së Sarandës për veprime të mëtejshme. Policia thekson se mbetet e angazhuar për mbrojtjen e territorit dhe mjedisit nga ndërtime të paligjshme.
Discussion about this post