Një dyqan bulmeti në lagjen nr. 3 të Pogradecit ka rënë pre e grabitjes gjatë orëve të natës, duke pësuar një dëm që kalon vlerën e 2 milionë lekëve. Autorët kanë thyer me forcë derën dhe kanë zbrazur të gjithë mallin.
Vjedhja u konstatua mëngjesin e sotëm rreth orës 07:30 nga vetë pronari, i cili u përball me biznesin e boshatisur. Ky është rasti i dytë brenda pesë muajsh që ky biznes bëhet shënjestër e hajdutëve, ndërsa autorët e të dyja ngjarjeve mbeten ende të paidentifikuar.
Policia ka sekuestruar kamerat e sigurisë rreth zonës dhe po punon për identifikimin dhe kapjen e autorëve.
“Jemi të shqetësuar dhe të frikësuar për punën tonë. Nuk punohet në këtë formë, të vidhet dy herë një biznes në qendër të qytetit dhe të mos kapet askush. Duam që policia ta zbardhë ngjarjen sa më shpejt. Nuk jemi aspak të qetë dhe nuk e di nëse do ta vazhdoj më këtë punë; është hera e dytë brenda 5 muajsh”, është shprehur pronari.
Discussion about this post