Qytetarë të shumtë iu përgjigjën pasditen e sotme thirrjeve për protestë përpara Ministrisë së Brendshme në mbështetje të policit Azbi Spahiu, i cili tentoi të vetëvritej pas arrestimit të djalit të oligarkut Samir Mane.
Redi Muçi, Mirela Ruko dhe Arlind Qori nga Lëvizja Bashkë shprehën shqetësimet lidhur me ngjarjen dhe reagimin aspak serioz të Ministrit të Brendshëm Ervin Hoxha, për të cilin ata kërkuan dorëheqjen, pasi sipas tyre po mundohet të manipulojë ngjarjen.
“Jemi këtu për të thyer heshtjen! Heshtja ju bën me turp, ju bën bashkëfajtor, e vërteta ju bën të lirë, kërkojmë dorëheqjen e ministrit,” thirri Muçi gjatë protestës.
“Ministri ka dështuar, në shërbim të kujt është kur në fjalën e tij të parë për ngjarjen nuk përqendrohet te arsyet, shkaku apo pasoja, por te protestuesit,” theksoi Ruko, sipas së cilës ai nuk kërkon zbardhjen e ngjarjes por fshehjen e saj.
Protestuesit hodhën akuza ndaj shtetit si të lidhur me okigarkët, duke pretenduar se rasti në fjalë është duke u kërkuar për t’u kaluar në heshtje.
“Ne do të jemi këtu për të vërtetën, transparencën dhe shtetin e së drejtës, çdo ditë deri sa të shkarkohet ministri,” u zotua Qori, i cili theksoi se duhet një angazhim i fortë dhe me guxim për barazi para ligjit dhe jo ndasi dhe privilegje për një grup njerëzish pranë pushtetit.
“Nëse nuk e gjejmë të vërtetën për Azbi Spahiun, nesër nga ballkoni do të bjerë një tjetër nga ne,” vijoi Qori.
“Sot jeni jetim, sot shteti ju ka braktisur,” u shpreh Adriatik Lapaj, teksa mbështetës të tij vijuan protestën krah ministrisë duke dënuar gjithashtu veprimet e ministrisë lidhur me rastin.
Protesta e sotme u organizua falë rrjeteve sociale. Ajo u thirr nga tre partitë e reja Lëvizja Bashkë, Shqipëria Bëhet dhe Nisma Thurje dhe vjen pas një heshtjeje të zgjatur nga autoritetet.
Për tre ditë, as Policia e Shtetit dhe as zyrtarë të lartë të qeverisë nuk ofruan një sqarim të qartë mbi motivet që mund të kenë çuar policin Spahiu drejt përpjekjes për vetëvrasje.
“Gijotina” raportoi disa ditë më parë se si efektivi i policisë u shty drejt vetëvrasjes nga presioni që iu bë pas arrestimit të djalit të Samir Manes, i cili i dehur në timon, përplasi dy automjete të parkuara.
Lexo edhe:
Discussion about this post