Një 34-vjeçar shqiptar, i dyshuar si anëtar i një bande mafioze shqiptare, është kthyer sërish në burg pasi u zbulua se një gardiane e kishte strehuar në shtëpinë e saj.
Ermal Gjergji, u kthye në burgun Lantin, Belgjikë, pasi u arrestua gjatë një kontrolli policor në fund të qershorit. Hetuesit zbuluan se shqiptari strehohej te një grua e cila prej më shumë se 20 vitesh punon si roje burgu në qendrën e paraburgimit të burgut Lantin.
Zbardhja e bisedave telefonike mes E. dhe Gjergjit ka treguar ndër të tjera se ata kishin patur kontakte të mëparshme. Sipas mediave belge, ata dyshohet se janë takuar në burg, ku edhe motra e E. ka qenë e burgosur për lidhje me mafian shqiptare.
Ndërkohë shqiptari Ermal Gjergji ra në sy në vitin 2020 gjatë trazirave ku pesë të burgosur u dhanë goditje të dhunshme oficerëve të burgut. Të burgosurit ishin strehuar në një çati pas një incidenti në oborr. Disa të arrestuar tentuan të ngjiteshin në një mur dhe njëri prej tyre u plagos kur u rrëzua. Kur rojet mbërritën atje, disa të burgosur i sulmuan duke i goditur.
Pas këtyre ngjarjeve, Ermal Gjergji u dërgua në një tjetër qendër paraburgimi në Tournai, ku do të vuante një dënim prej 30 muajsh pas këtyre trazirave.
Pas lirimit nga burgu, u zbulua se ndaj tij kishte një urdhër arresti, prandaj policia u vu në kërkim të tij.
Discussion about this post